لاہور(پنجاب پوسٹ)جماعت اسلامی کے امیر حافظ نعیم الرحمان کی کال پر پیٹرولیم لیوی اور بڑھتی ہوئی مہنگائی کے خلاف ملک گیر ہڑتال جاری ہے۔ لاہور میں بھی جماعت اسلامی کی ہڑتال کی کال پر مختلف اہم تجارتی مراکز اور مارکیٹوں میں کاروباری سرگرمیاں معطل ہیں اور متعدد مارکیٹیں تاحال شٹر ڈاؤن ہیں۔
لاہور کی عابد مارکیٹ، ہال روڈ، نسبت روڈ مارکیٹ اور اچھرہ بازار بند ہیں، جبکہ کوئنز روڈ، فیروزپور روڈ اور مال روڈ کی مارکیٹوں میں بھی دکانیں بند ہیں۔ ہڑتال کے باعث مختلف تجارتی علاقوں میں معمول کی کاروباری سرگرمیاں متاثر ہوئی ہیں۔
جماعت اسلامی کی جانب سے پیٹرولیم لیوی کے خاتمے، پیٹرولیم مصنوعات کی قیمتوں میں کمی اور عوام پر مہنگائی کا بوجھ کم کرنے کا مطالبہ کیا جا رہا ہے۔ جماعت اسلامی کا مؤقف ہے کہ حکومت عوام کو ریلیف دینے کے بجائے اضافی ٹیکسز اور مہنگائی کا بوجھ منتقل کر رہی ہے۔
دوسری جانب حکومت اور جماعت اسلامی کے درمیان مذاکرات بھی آج دوپہر 3 بجے منصورہ لاہور میں متوقع ہیں، جہاں حکومتی وفد جماعت اسلامی کی قیادت سے ملاقات کرکے دھرنے کے خاتمے اور مطالبات پر بات چیت کرے گا۔ وفاقی وزیر احسن اقبال نے کہا ہے کہ حکومت نیک نیتی سے مذاکرات کے لیے جا رہی ہے اور مسائل کا حل بات چیت کے ذریعے نکالا جانا چاہیے۔
لاہور میں ہڑتال کی تازہ صورتحال: عابد مارکیٹ، ہال روڈ، نسبت روڈ مارکیٹ، اچھرہ بازار، کوئنز روڈ، فیروزپور روڈ اور مال روڈ کی مارکیٹس تاحال بند ہیں۔ شہریوں اور تاجروں کا مطالبہ ہے کہ پیٹرولیم لیوی کا بھتہ ختم کیا جائے، پیٹرولیم مصنوعات کی قیمتوں میں کمی کی جائے اور عوام کو مہنگائی سے فوری ریلیف دیا جائے۔
یہ بھی پڑھیں:لاہور ہائیکورٹ میں مال روڈ سے جماعت اسلامی کا دھرنا ختم کرانے کیلئے درخواست دائر
جڑانوالہ
جڑانوالہ میں پٹرولیم مصنوعات پر لیوی ٹیکس کے خلاف جماعت اسلامی کی اپیل پر جزوی ہڑتال، مسجد بازار، گوردوارہ بازار، منڈی بازار، نیا بازار اور سرکلر روڈ جزوی طور پر بند رہے، جماعت اسلامی کے رہنماؤں ڈاکٹر سعید احمد، رانا عبدالوحید، باسم سعید اور زاہد حسین نے کہا کہ پٹرولیم مصنوعات پر لیوی کے نام پر عوام سے بھتہ وصول کیا جا رہا ہے، قیمتوں میں اضافے سے ہر طبقۂ زندگی متاثر ہو رہا ہے، حافظ نعیم الرحمن کی کال پر تاجروں نے شٹر ڈاؤن ہڑتال کی ہے جبکہ لیوی ٹیکس کے خاتمے تک دھرنے، ہڑتالیں اور احتجاجی پروگرام جاری رہیں گے۔
اوکاڑہ
اوکاڑہ میں جماعت اسلامی کی اپیل پر تاجروں کی جانب سے شٹر ڈاؤن ہڑتال، صدر بازار، گول چوک، کچہری بازار سمیت دیگر بازاروں میں دکانیں مکمل طور پر بند رہیں، چند تاجروں کی جانب سے دکانیں بند نہ کرنے پر دکانداروں اور جماعت اسلامی کے عہدیداران کے درمیان تلخ کلامی بھی ہوئی، جماعت اسلامی کے عہدیداران اور کارکنوں کی بڑی تعداد گول چوک میں جمع ہوئی جبکہ جماعت اسلامی کی جانب سے احتجاجی ریلی بھی نکالی گئی، مظاہرین نے پٹرولیم مصنوعات کی قیمتوں میں کمی اور بجلی کی غیر اعلانیہ لوڈشیڈنگ کے خاتمے کا مطالبہ کیا، امیر جماعت اسلامی ضلع اوکاڑہ انجینئر سلمان اظہر شیخ نے احتجاجی کیمپ سے خطاب کرتے ہوئے کہا کہ حکومت مکمل طور پر ناکام ہو چکی ہے اور عوام پر بے جا ٹیکسوں کے باعث مہنگائی میں مسلسل اضافہ ہو رہا ہے۔
