لاہور(پنجاب پوسٹ)صوبائی وزیر مواصلات و تعمیرات پنجاب ملک صہیب احمد بھرتھ کی زیر صدارت موبائل ایکسل لوڈ مینجمنٹ سسٹم کے جائزے کے حوالے سے اجلاس منعقد ہوا، جس میں سیکرٹری سی اینڈ ڈبلیو راجہ جہانگیر انور، اسپیشل سیکرٹری، ایڈیشنل سیکرٹری اور چیف انجینئرز نے شرکت کی۔ اجلاس میں صوبائی وزیر کو موبائل ایکسل لوڈ مینجمنٹ سسٹم اور موبائل ویٹ اسٹیشنز کی کارکردگی کے حوالے سے تفصیلی بریفنگ دی گئی۔
بریفنگ میں بتایا گیا کہ پنجاب کے پانچ اضلاع اٹک، جہلم، چکوال، ملتان اور جھنگ میں موبائل ایکسل لوڈ مینجمنٹ سسٹم فعال کر دیا گیا ہے، جبکہ موبائل ویٹ اسٹیشنز کے ذریعے بھاری گاڑیوں کے ایکسل لوڈ کی باقاعدگی سے جانچ اور اوور لوڈنگ کے خلاف کارروائیاں جاری ہیں۔
صوبائی وزیر ملک صہیب احمد بھرتھ نے کہا کہ موبائل ایکسل لوڈ مینجمنٹ سسٹم کا بنیادی مقصد اوور لوڈنگ کے باعث سڑکوں کو ہونے والی ٹوٹ پھوٹ سے بچانا ہے۔ موبائل ویٹ اسٹیشنز کے ذریعے مقررہ حد سے زائد وزن لادنے والی بھاری گاڑیوں کی مؤثر نگرانی کی جائے گی، جس سے سڑکوں کی پائیداری بہتر بنانے کے ساتھ ٹریفک حادثات کی روک تھام میں بھی مدد ملے گی۔
یہ بھی پڑھیں:پنجاب حکومت نے 51 شہروں میں سیلاب سے بچاؤ کیلئے کونسا حیرت انگیز منصوبہ بنا لیا ہے؟
اجلاس میں موبائل ویٹ اسٹیشنز پر تعینات عملے کی تربیت کے حوالے سے بھی صوبائی وزیر کو بریفنگ دی گئی۔ ملک صہیب احمد بھرتھ نے بتایا کہ پنجاب کے پانچوں موبائل ویٹ اسٹیشنز پر مطلوبہ آلات اور ضروری سہولیات فراہم کر دی گئی ہیں تاکہ اوور لوڈنگ کے خلاف مؤثر اور بروقت کارروائی یقینی بنائی جا سکے۔
صوبائی وزیر نے کہا کہ پنجاب میں پہلی مرتبہ موبائل ویٹ اسٹیشنز کا عملی نفاذ کیا گیا ہے اور انہیں ضرورت کے مطابق مختلف شاہراہوں پر منتقل کیا جا سکتا ہے۔ یہ اسٹیشنز بالخصوص ان شاہراہوں پر تعینات کیے جا رہے ہیں جہاں سے بھاری ٹرانسپورٹ پنجاب کے مختلف علاقوں تک جاتی ہے۔
ملک صہیب احمد بھرتھ کے مطابق موبائل ایکسل لوڈ مینجمنٹ سسٹم اوور لوڈنگ کے مؤثر تدارک اور پنجاب کی سڑکوں کے تحفظ میں اہم کردار ادا کرے گا۔ وزیراعلیٰ پنجاب مریم نواز شریف کے وژن کے مطابق سڑکوں کے تحفظ، ٹریفک سیفٹی، اوور لوڈنگ کی روک تھام، سڑکوں کی پائیداری اور شہریوں کے محفوظ سفر کو یقینی بنانے کے لیے اقدامات جاری ہیں۔
