بہاولنگر ( پنجاب پوسٹ ) بہاولنگر کے حیدر اسٹیڈیم میں جشنِ آزادی سپورٹس گالا کی افتتاحی تقریب منعقد ہوئی، جس میں انٹر ڈسٹرکٹ ہاکی ٹورنامنٹ کا بھی شاندار آغاز کردیا گیا۔ تقریب میں ایڈیشنل ڈپٹی کمشنر (جنرل) محمد وسیم نے بطور مہمانِ خصوصی شرکت کی اور سپورٹس گالا کا باقاعدہ افتتاح کیا۔
تقریب کی میزبانی کے فرائض ڈسٹرکٹ سپورٹس آفیسر عظمیٰ بشیر نے انجام دیے۔ اس موقع پر مختلف سرکاری افسران، سکولز کے طلباء و طالبات، کھلاڑیوں، شائقین اور شہریوں کی بڑی تعداد نے شرکت کی۔ حیدر اسٹیڈیم میں جشنِ آزادی کے حوالے سے منعقدہ اس سپورٹس ایونٹ کے دوران قومی جذبے اور کھیلوں کے فروغ کا خوبصورت امتزاج دیکھنے میں آیا۔
جشنِ آزادی سپورٹس گالا کے تحت انٹر ڈسٹرکٹ ہاکی ٹورنامنٹ کا افتتاحی میچ بہاولنگر اور منڈی صادق گنج کی ٹیموں کے درمیان کھیلا گیا۔ دونوں ٹیموں کے کھلاڑیوں نے بھرپور جوش و جذبے کے ساتھ کھیل کا مظاہرہ کیا، جبکہ میچ کے دوران شائقین بھی اپنی اپنی ٹیموں کی حوصلہ افزائی کرتے رہے۔
حیدر اسٹیڈیم کھلاڑیوں اور شائقین کے جوش و خروش سے گونجتا رہا، جبکہ پاکستان زندہ باد کے نعروں نے تقریب کے ماحول کو مزید پرجوش بنا دیا۔ بہترین کھیل پیش کرنے والے کھلاڑیوں کو شائقین کی جانب سے بھرپور داد دی گئی اور نوجوان کھلاڑیوں کی حوصلہ افزائی کی گئی۔
افتتاحی میچ میں منڈی صادق گنج کی ٹیم نے عمدہ کھیل کا مظاہرہ کرتے ہوئے بہاولنگر کی ٹیم کو ایک گول سے شکست دے کر کامیابی اپنے نام کرلی۔ میچ کے دوران دونوں ٹیموں کے درمیان سخت مقابلہ دیکھنے میں آیا اور کھلاڑیوں نے جیت کے لیے بھرپور کوشش کی۔
اس موقع پر ایڈیشنل ڈپٹی کمشنر (جنرل) محمد وسیم کا کہنا تھا کہ جشنِ آزادی کے موقع پر کھیلوں کے مقابلوں کا انعقاد نوجوانوں کو صحت مند اور مثبت سرگرمیوں کی جانب راغب کرنے کا مؤثر ذریعہ ہے۔ کھیل نوجوان نسل میں نظم و ضبط، ٹیم ورک، برداشت اور مثبت سوچ کو فروغ دیتے ہیں، جبکہ ایسے ایونٹس نوجوانوں میں حب الوطنی اور ملی جذبے کو بھی اجاگر کرتے ہیں۔
تقریب کے اختتام پر ملک کی سلامتی، ترقی، خوشحالی اور استحکام کے لیے خصوصی دعائیں بھی کی گئیں۔ جشنِ آزادی سپورٹس گالا کے تحت مختلف کھیلوں کے مقابلوں کا سلسلہ جاری رہے گا، جس میں کھلاڑیوں کو اپنی صلاحیتوں کے اظہار کا موقع فراہم کیا جائے گا۔
