لاہور(پنجاب پوسٹ)پاکستان کرکٹ بورڈ (پی سی بی) نے متعدد قومی کرکٹرز کو بیرونِ ملک فرنچائز لیگز اور کاؤنٹی کرکٹ میں شرکت کے لیے نو آبجیکشن سرٹیفکیٹس (این او سی) جاری کردیے ہیں۔ پی سی بی کے اس فیصلے کے بعد کئی پاکستانی کھلاڑی کیریبین پریمیئر لیگ (سی پی ایل) اور کاؤنٹی کرکٹ میں اپنی صلاحیتوں کا مظاہرہ کر سکیں گے۔
میڈیا ذرائع کے مطابق پی سی بی نے حسن نواز، حنین شاہ، نسیم شاہ، عثمان خان، معاذ صداقت، صاحبزادہ فرحان، سفیان مقیم اور شاداب خان کو کیریبین پریمیئر لیگ میں شرکت کی اجازت دے دی ہے۔ ان کھلاڑیوں کے این او سی 19 اگست سے 21 ستمبر تک مؤثر ہوں گے۔
یہ بھی پڑھیں:پاکستان کی حالیہ خراب کارکردگی پر کسی کپتان یا کوچ کو ذمہ دار نہیں ٹھہراؤں گا، اظہر علی
پی سی بی کی جانب سے اسپنر نعمان علی کو لنکاشائر کاؤنٹی کی نمائندگی کے لیے بھی این او سی جاری کیا گیا ہے، جس کی مدت 27 ستمبر تک مقرر کی گئی ہے۔ اس اجازت کے ذریعے نعمان علی کو انگلش کاؤنٹی کرکٹ میں اپنی کارکردگی دکھانے کا موقع ملے گا۔
اسی طرح وکٹ کیپر بیٹر محمد حارث کو 7 اگست سے 20 ستمبر تک جبکہ عثمان طارق کو 8 اگست سے 18 ستمبر تک کیریبین پریمیئر لیگ میں شرکت کی اجازت دی گئی ہے۔
دوسری جانب اسامہ میر کو بھی سی پی ایل میں شرکت کے لیے 7 اگست سے 21 ستمبر تک این او سی جاری کیا گیا ہے۔ یوں متعدد پاکستانی کھلاڑی آئندہ ہفتوں کے دوران مختلف عالمی فرنچائزز کے ساتھ کھیلتے ہوئے بین الاقوامی سطح پر اپنی صلاحیتوں کا مظاہرہ کریں گے۔
پی سی بی کے اس فیصلے سے قومی کرکٹرز کو ڈومیسٹک کرکٹ کی مصروفیات کے بعد غیر ملکی لیگز میں کھیلنے اور مختلف عالمی کھلاڑیوں کے ساتھ تجربہ حاصل کرنے کا موقع ملے گا۔ فرنچائز کرکٹ میں شرکت سے کھلاڑیوں کو بین الاقوامی طرز کی مسابقتی کرکٹ کا تجربہ بھی حاصل ہوگا، جو مستقبل میں قومی ٹیم کے لیے ان کی کارکردگی میں بہتری کا باعث بن سکتا ہے۔
