لاہور(پنجاب پوسٹ)پنجاب کے صوبائی وزیر قانون رانا محمد اقبال خان نے ایچی سن کالج کے طالبعلم ماجد اسلم کی پراسرار گمشدگی کا فوری نوٹس لیتے ہوئے ڈی پی او رحیم یار خان سے واقعے کی تفصیلی رپورٹ طلب کر لی ہے۔ وزیر قانون نے ہدایت کی ہے کہ طالبعلم کی گمشدگی کا مقدمہ فوری طور پر درج کیا جائے اور تمام دستیاب وسائل بروئے کار لاتے ہوئے اس کی جلد از جلد اور بحفاظت بازیابی کو یقینی بنایا جائے۔
صوبائی وزیر قانون رانا محمد اقبال خان نے اپنے بیان میں کہا کہ ماجد اسلم اپنی گاڑی پر رحیم آباد سے صادق آباد جاتے ہوئے لاپتہ ہوا، جبکہ ابتدائی معلومات کے مطابق اس کی گاڑی کی آخری لوکیشن بلوچستان میں ٹریس ہونے کا انکشاف ہوا ہے۔ دوسری جانب اہل خانہ نے خدشہ ظاہر کیا ہے کہ طالبعلم کو اغواء کیا گیا ہے، جس کے باعث معاملہ انتہائی حساس نوعیت اختیار کر گیا ہے۔
رانا محمد اقبال خان نے قانون نافذ کرنے والے اداروں کو ہدایت کی کہ وہ فوری، مؤثر اور مربوط کارروائی کرتے ہوئے طالبعلم کا سراغ لگائیں اور تمام ممکنہ پہلوؤں پر تحقیقات کی جائیں۔ انہوں نے کہا کہ حکومت پنجاب شہریوں کے جان و مال کے تحفظ کو اپنی بنیادی ذمہ داری سمجھتی ہے اور اس معاملے میں کسی قسم کی غفلت برداشت نہیں کی جائے گی۔
صوبائی وزیر قانون نے اس عزم کا اعادہ کیا کہ حکومت پنجاب طالبعلم ماجد اسلم کی بحفاظت بازیابی کے لیے تمام متعلقہ اداروں کے ساتھ مکمل تعاون اور نگرانی جاری رکھے گی تاکہ اہل خانہ کی تشویش کا جلد از جلد ازالہ کیا جا سکے۔
