لاہور(پنجاب پوسٹ) شاد باغ میں گھر کی دہلیز پر کھڑی خاتون کو مبینہ طور پر فحش انداز میں ہراساں کرنے والے ملزم کو پولیس نے زخمی حالت میں گرفتار کر لیا۔
پولیس کے مطابق واقعے کا مقدمہ درج کرنے کے بعد ملزم کی شناخت اور گرفتاری کے لیے سی سی ٹی وی فوٹیج سے مدد لی گئی، جس میں ملزم کو خاتون کو ہراساں کرنے کے بعد موقع سے فرار ہوتے دیکھا جا سکتا ہے۔
یہ بھی پڑھیں:لاہور میں بچوں اور خواتین کیخلاف جنسی جرائم کے مجرم، 24 گھنٹوں میں کیسے گرفتار ہوئے
ایس پی سٹی عاطف امیر کے مطابق ملزم کی گرفتاری کے لیے مختلف مقامات پر چھاپے مارے گئے۔ کارروائی کے دوران ملزم عثمان مسیح پولیس کو دیکھ کر موٹر سائیکل پر فرار ہوگیا۔
پولیس نے ناکے پر ملزم کو روکنے کی کوشش کی تاہم وہ نہ رکا۔ فرار کے دوران تیز رفتاری کے باعث موٹر سائیکل بے قابو ہو کر پل سے گر گئی، جس کے نتیجے میں ملزم زخمی ہوگیا۔
پولیس نے زخمی ملزم کو گرفتار کرکے ہسپتال منتقل کر دیا۔ ایس پی سٹی کے مطابق ملزم کے بازو پر چوٹ آئی ہے جبکہ واقعے کی مزید تحقیقات جاری ہیں۔
