لاہور(پنجاب پوسٹ) میں امن و امان کی صورتحال مزید بہتر بنانے اور جرائم پیشہ عناصر کے خلاف کارروائیوں کو تیز کرنے کے لیے سول لائنز ڈویژن کی اینٹی کرائم میٹنگ میں اہم فیصلے کیے گئے۔ ڈی آئی جی آپریشنز فیصل کامران نے دوٹوک الفاظ میں کہا کہ شہر میں غیر قانونی مقیم افغان باشندوں، اشتہاری ملزمان، منشیات فروشوں، گٹکا مافیا، قماربازوں اور دیگر جرائم پیشہ عناصر کے خلاف بلاامتیاز کارروائیاں یقینی بنائی جائیں گی، جبکہ ناقص کارکردگی اور غفلت ہرگز برداشت نہیں کی جائے گی۔
اجلاس کی صدارت ڈی آئی جی آپریشنز فیصل کامران نے کی، جس میں ایس پی سکیورٹی، ایس پی سول لائنز، تمام سرکل افسران اور ایس ایچ اوز نے شرکت کی۔ اجلاس میں ڈویژن میں جرائم کی صورتحال، اشتہاری ملزمان کی گرفتاری، غیر قانونی اسلحہ، ہوائی فائرنگ، منشیات فروشی اور دیگر اہم امور کا تفصیلی جائزہ لیا گیا۔
ڈی آئی جی آپریشنز نے واضح ہدایات جاری کرتے ہوئے کہا کہ غیر قانونی مقیم افغان باشندوں کی گرفتاری، جانچ پڑتال اور قانونی کارروائی میں کسی بھی قسم کی غفلت ناقابل قبول ہوگی۔ قانون پر بلاامتیاز عملدرآمد یقینی بنایا جائے اور کسی کو بھی قانون سے بالاتر نہ سمجھا جائے۔
اجلاس میں ناقص سپر ویژن پر ایس ڈی پی او مزنگ کو وضاحتی لیٹر جاری کیا گیا، جبکہ ایس ایچ او قلعہ گجر سنگھ اور ایس ایچ او لٹن روڈ کو جرائم پیشہ عناصر کے خلاف کارروائیاں مزید مؤثر بنانے کے احکامات دیے گئے۔ ایس ایچ او سول لائنز کو اشتہاری مجرمان کی گرفتاری کے مقررہ اہداف جلد مکمل کرنے کی بھی ہدایت کی گئی۔
فیصل کامران نے تمام افسران کو کانفرنس کالز پر بروقت اور مؤثر ریسپانس دینے کی ہدایت کرتے ہوئے کہا کہ تعلیمی اداروں کے اطراف منشیات کے خاتمے کے لیے خصوصی اقدامات کیے جائیں تاکہ نوجوان نسل کو اس ناسور سے محفوظ رکھا جا سکے۔ انہوں نے گٹکا فروشوں کے خلاف بھی سخت کارروائیوں کا حکم دیتے ہوئے کہا کہ نوجوانوں کو گٹکے کی لعنت سے بچانا پولیس کی اہم ذمہ داری ہے۔
ڈی آئی جی آپریشنز نے مزید ہدایت کی کہ غیر قانونی اسلحہ رکھنے والوں، ہوائی فائرنگ میں ملوث افراد، قماربازوں اور قحبہ خانوں کے خلاف بلاامتیاز کارروائیاں کی جائیں۔ انہوں نے ایس آئی پیز (SIPs) ایس او پیز پر سختی سے عملدرآمد یقینی بنانے اور تھانوں میں آنے والے سائلین کے ساتھ عزت و احترام سے پیش آ کر ان کے مسائل فوری حل کرنے کی بھی ہدایت کی۔
