لاہور (پنجاب پوسٹ) لاہور میں مبینہ زیادتی کا نشانہ بننے والے 15 سالہ لڑکے نے ملزم کی عدم گرفتاری کے خلاف منفرد انداز میں احتجاج کرتے ہوئے پریس کلب کے باہر درخت پر چڑھ گیا۔
تفصیلات کے مطابق لاہور کے علاقے ہڈیارہ کا رہائشی نبیل نامی لڑکا اپنے ساتھ پیش آنے والے واقعے میں نامزد ملزم طاہر کی گرفتاری نہ ہونے پر شدید احتجاج کرتے ہوئے درخت پر چڑھ گیا۔ اس دوران لڑکے نے اپنے ہاتھ میں پیٹرول کی بوتل بھی اٹھا رکھی تھی اور دھمکی دی کہ انصاف نہ ملنے کی صورت میں وہ خود کشی کر لے گا۔
واقعے کی اطلاع ملتے ہی پولیس اہلکار موقع پر پہنچ گئے اور صورتحال کو قابو میں کرنے کے لیے کارروائی کرتے ہوئے متاثرہ لڑکے کو بحفاظت درخت سے نیچے اتار کر اپنی تحویل میں لے لیا۔
پولیس حکام کے مطابق متاثرہ لڑکے کے ساتھ مبینہ زیادتی کا مقدمہ 28 جون کو اس کے بھائی کی مدعیت میں تھانہ ہڈیارہ میں درج کیا گیا تھا، جبکہ ملزم کی گرفتاری کے لیے کارروائی جاری ہے۔
یہ بھی پڑھیں:غیرت کے نام پر زہر یا کوئی اور راز؟ ٹیکسلا میں قتل کاہولناک واقعہ
واقعے نے شہریوں میں تشویش کی لہر دوڑا دی ہے اور متاثرہ خاندان کی جانب سے فوری انصاف کی فراہمی کا مطالبہ کیا جا رہا ہے۔
