اسلام آباد (پنجاب پوسٹ) چینی شہری خاتون چن شی نے سیکٹر F-6/1 میں واقع ایک ہوٹل میں اپنی رہائش سے متعلق شکایت درج کرانے کے لیے تھانہ کوہسار سے رجوع کیا۔خاتون کے مطابق ان کے کمرے کو تالا لگا کر سیل کر دیا گیا تھا، جس کے باعث انہیں ہوٹل میں داخل ہونے سے روک دیا گیا ۔ شکایت موصول ہونے کے بعد ایس ڈی پی او کوہسار اور ایس پی سٹی کی نگرانی میں فوری طور پر جامع انکوائری شروع کی گئی تاکہ تمام حقائق کا تعین کیا جا سکے۔ ابتدائی تحقیقات سے معلوم ہوا کہ مس چن شی گزشتہ تقریباً ایک ماہ سے ہوٹل کے کمرے میں بغیر کسی باقاعدہ کرایہ داری معاہدے یا جائیداد کے مالک کی واضح اجازت کے مقیم تھیں۔اسلام آباد پولیس ذرائع کے مطابق تحقیقات میں یہ بھی سامنے آیا کہ فریقین کے درمیان مالی تنازع موجود ہے، کیونکہ شکایت کنندہ مسلسل اپنے واجبات ادا کرنے میں ناکام رہیں۔ بعد ازاں ہوٹل کے مالک بھی انکوائری میں شامل ہوئے اور غیر ادا شدہ بقایاجات اور غیر مجاز رہائش سے متعلق اپنے مؤقف کی تائید میں متعلقہ دستاویزی شواہد پیش کیے۔معاملے میں مزید انتظامی اور ضابطہ جاتی پیچیدگیاں بھی موجود ہیں۔ ہوٹل کی عمارت کو کیپیٹل ڈویلپمنٹ اتھارٹی نے الگ انتظامی خلاف ورزیوں کی بنیاد پر پہلے ہی سیل کر رکھا ہے۔دریں اثنا، چینی شہری نے اس واقعے کی ویڈیوز بھی ریکارڈ کی ہیں اور بظاہر انہیں مقامی قانون نافذ کرنے والے اداروں پر بیرونی سطح پر دباؤ یا ایک مخصوص بیانیہ قائم کرنے کی کوشش کے لیے استعمال کر رہی ہیں۔فی الوقت مقامی پولیس کی اعلیٰ قیادت دونوں فریقین سے رابطے میں ہے اور مالک مکان اور چینی شہری کے درمیان مالی اور انتظامی تعطل کو بات چیت کے ذریعے حل کر کے باہمی مفاہمت کی کوشش کر رہی ہے۔
واضح رہے کہ معاملہ حل ہونے کے بعد خاتون کی جانب سے اپنی غلطی تسلیم کرتے ہوئے اسلام آباد پولیس کا شکریہ بھی ادا کیا گیا
