گجرات (پنجاب پوسٹ) تھانہ صدر جلال پور جٹاں کے علاقے موضع بھکوکی میں شادی کی تقریب میں آئی ہوئی 12 سالہ معصوم بچی کو مبینہ طور پر کئی روز تک زیادتی کا نشانہ بنانے کا انتہائی افسوسناک واقعہ سامنے آیا ہے۔ پولیس نے متاثرہ بچی کے والد کی مدعیت میں مقدمہ درج کر کے 3 نامزد ملزمان میں سے 2 کو فوری طور پر حراست میں لے لیا ہے جبکہ ایک مفرور ملزم کی گرفتاری کے لیے چھاپے مارے جا رہے ہیں۔
تفصیلات کے مطابق متاثرہ بچی گڑھی احمد آباد سے موضع بھکوکی میں جاوید اقبال نامی شخص کے گھر شادی کی تقریب میں شرکت کے لیے آئی ہوئی تھی۔ دورانِ تقریب نامزد ملزم سمیر نے بچی کو بہلا پھسلا کر امیر حسن کی بیٹھک میں لے جا کر زیادتی کا نشانہ بنایا۔ ایف آئی آر کے مطابق یہ انسانیت سوز سلسلہ ایک بار نہیں بلکہ گزشتہ 9 سے 10 روز کے دوران مختلف اوقات میں مسلسل جاری رہا۔
یہ بھی پڑھیں: لاہور ہائیکورٹ ملتان بینچ نے کمسن بچے سے بدفعلی کے مجرم کی عمر قید برقرار رکھ دی
ذرائع کے مطابق واقعے کو دبانے کی کوشش بھی کی گئی، جہاں مسمی جاوید اقبال نے مبینہ طور پر رشتہ داری کا حوالہ دے کر متاثرہ خاندان کو اب تک کسی بھی قسم کی قانونی کارروائی کرنے سے روکے رکھا، جس کی وجہ سے معاملہ تاخیر سے پولیس تک پہنچا۔
بچی کے والد محمد صدیق اکبر کی مدعیت میں تھانہ صدر جلال پور جٹاں میں مقدمہ نمبر 370/26 درج کر لیا گیا ہے۔ مقدمے میں تین ملزمان سمیر ولد جاوید اقبال، عثمان چٹھہ ولد ظفر اقبال اور عمیر ولد نوید اختر کو نامزد کیا گیا ہے۔
ترجمان پولیس کا کہنا ہے کہ کارروائی کرتے ہوئے دو نامزد ملزمان کو گرفتار کر لیا گیا ہے جبکہ تیسرے مفرور ملزم کی گرفتاری کے لیے پولیس کی جانب سے مختلف مقامات پر چھاپے مارے جا رہے ہیں، جسے بہت جلد گرفتار کر کے قانون کے کٹہرے میں لایا جائے گا۔
