پنجاب میں عید الاضحی، ریسکیو 1122 نے کیا انتظامات کر رکھے ہیں؟

لاہور( پنجاب پوسٹ) پنجاب ایمرجنسی سروس Rescue 1122 نے عیدالاضحیٰ کے موقع پر صوبہ بھر میں ریسکیو اور میڈیکل کور فراہم کرنے کیلئے خصوصی انتظامات مکمل کر لیے ہیں۔
ترجمان ریسکیو 1122 کے مطابق آج پنجاب بھر میں 12 ہزار سے زائد ریسکیورز فرائض سرانجام دے رہے ہیں جبکہ 896 ایمبولینسز، 2300 ریسکیو موٹر بائیکس اور 316 فائر وہیکلز کو اہم مقامات پر تعینات کیا گیا ہے۔
ریسکیو حکام کے مطابق عید کے بڑے اجتماعات، عید گاہوں اور رش والے مقامات پر خصوصی ریسکیو ٹیمیں تعینات ہیں جبکہ فوری ایمرجنسی سروسز کی فراہمی کیلئے عید گاہوں کے قریب خصوصی ریسکیو پوسٹس بھی قائم کی گئی ہیں۔
ترجمان کے مطابق تنگ راستوں اور گنجان آبادی والے علاقوں میں بروقت رسائی یقینی بنانے کیلئے ریسکیو موٹر بائیکس اہم پوائنٹس پر موجود ہیں۔ علاوہ ازیں دریاؤں، نہروں اور تفریحی مقامات پر ممکنہ حادثات سے نمٹنے کیلئے خصوصی واٹر ریسکیو ٹیمیں بھی تعینات کر دی گئی ہیں۔
ریسکیو 1122 کا صوبائی ایمرجنسی آپریشن سینٹر تمام ریسکیو آپریشنز کی مسلسل مانیٹرنگ کر رہا ہے جبکہ عید ڈیوٹی کے ساتھ ساتھ معمول کے ریسکیو آپریشنز بھی جاری رہیں گے۔
شہریوں سے اپیل کی گئی ہے کہ کسی بھی ایمرجنسی کی صورت میں فوری طور پر ہیلپ لائن 1122 پر رابطہ کریں۔