لاہور ( پنجاب پوسٹ ) خواتین اور بچوں سے زیادتی جیسے سنگین الزامات کے مقدمات کے اخراج کے اعدادوشمار سامنے آئے ہیں، جن کے مطابق رواں سال جنوری سے اکتوبر تک اغوا، زیادتی اور گینگ ریپ کے متعدد مقدمات تفتیش اور فرانزک رپورٹس کی روشنی میں خارج کیے گئے۔
پولیس ریکارڈ کے مطابق لاہور میں اغوا کے درج مقدمات میں سے 82 فیصد منسوخ کیے گئے، جبکہ خواتین سے زیادتی کے مقدمات میں سے 42 فیصد خارج ہوئے۔ اسی طرح گینگ ریپ کے درج مقدمات میں سے 34 فیصد اور بچوں سے زیادتی کے مقدمات میں سے 33 فیصد تفتیش کے بعد خارج کیے گئے۔
پولیس ریکارڈ میں بتایا گیا ہے کہ یہ مقدمات فرانزک رپورٹس اور تفتیش کے دوران الزامات ثابت نہ ہونے پر خارج کیے گئے۔ بعض حلقوں کا کہنا ہے کہ ایسے سنگین الزامات کو مبینہ طور پر ذاتی مفادات کے حصول کے لیے بھی استعمال کیا جاتا رہا ہے۔
تاہم اعدادوشمار کے مطابق سنگین نوعیت کے مقدمات کے اندراج اور بعد ازاں ان کے اخراج کا معاملہ توجہ طلب ہے۔ مقدمات کے اخراج کو ہر صورت میں دانستہ جھوٹا الزام قرار نہیں دیا جا سکتا، کیونکہ کئی مقدمات ناکافی شواہد، صلح یا دیگر قانونی وجوہات کی بنا پر بھی خارج ہو سکتے ہیں۔
