لاہور (پنجاب پوسٹ) علامہ اقبال اوپن یونیورسٹی کے وائس چانسلر پروفیسر ڈاکٹر ناصر محمود نے شاعرِ مشرق، مفکرِ پاکستان ڈاکٹر علامہ محمد اقبالؒ کے 149ویں یومِ ولادت کے موقع پر یونیورسٹی کے اعلیٰ سطحی وفد کے ہمراہ مزارِ اقبال پر حاضری دی اور عظیم مفکر کو خراجِ عقیدت پیش کیا۔
اس موقع پر وائس چانسلر پروفیسر ڈاکٹر ناصر محمود نے مزارِ اقبال پر پھولوں کی چادر چڑھائی اور فاتحہ خوانی کی۔ وفد میں ڈائریکٹر جنرل ریجنل سروسز ڈاکٹر ملک توقیر احمد خان، ریجنل ڈائریکٹر لاہور احسن شکور سمیت یونیورسٹی کے دیگر افسران اور ملازمین بھی شامل تھے۔
یہ بھی پڑھیں:علامہ اقبالؒ کا فلسفۂ خودی نوجوان نسل کے لیے مشعلِ راہ ہے، ملک صہیب احمد بھرتھ
اس موقع پر گفتگو کرتے ہوئے وائس چانسلر پروفیسر ڈاکٹر ناصر محمود نے کہا کہ یہ ان کے لیے انتہائی اعزاز اور باعثِ فخر ہے کہ وہ اس عظیم تعلیمی ادارے میں خدمات انجام دے رہے ہیں جس کا نام برصغیر کے عظیم مفکر، شاعر اور فلسفی علامہ محمد اقبالؒ سے منسوب ہے۔ وائس چانسلر نے کہا کہ علامہ اقبالؒ کی شاعری اور فکر محض ایک عہد تک محدود نہیں بلکہ ان کا پیغام آنے والی نسلوں کے لیے بھی رہنمائی کا سرچشمہ ہے۔
اقبالؒ نے مسلمانوں کو خود شناسی، علم، فکری بیداری اور عملی جدوجہد کا درس دیا، جس پر عمل پیرا ہو کر ایک مضبوط اور باوقار معاشرے کی تشکیل ممکن ہے۔ انہوں نے مزید کہا کہ علامہ اقبالؒ کی 150ویں سالگرہ کا سال شروع ہونے کے موقع پر ان کی فکر و فلسفے کو اجاگر کرنے اور نئی نسل تک ان کا پیغام پہنچانے کی اہمیت مزید بڑھ جائے گی۔ علامہ اقبال اوپن یونیورسٹی کا یہ اقدام قومی شاعر کے افکار و نظریات سے وابستگی اور ان کے پیغام کو فروغ دینے کے عزم کا اظہار ہے۔
