حافظ آباد (پنجاب پوسٹ) حافظ آباد میں ملاوٹ مافیا کے خلاف پنجاب فوڈ اتھارٹی کی کارروائی، جگانوالہ روڈ پر معروف ملک شاپ پر چھاپہ مار کر غیر معیاری ڈیری کریم برآمد کر لی گئی۔ لیبارٹری رپورٹ میں نمونہ فیل ہونے پر دکان بند کر کے مقدمہ درج کر لیا جبکہ ایک ملزم کو موقع سے گرفتار کر لیا گیا۔
ڈی جی فوڈ اتھارٹی منصور احمد کے مطابق ملاوٹ اور غیر معیاری اشیاء فروخت کرنے والوں کے خلاف زیرو ٹالرنس پالیسی کے تحت کارروائیاں جاری رہیں گی۔
یہ بھی پڑھیں: لاہور شہر کی ماڈل ریڑھیوں پر اب کیش نہیں چلے گا ، نیا کیش لیس نظام کیا ہوگا ؟
پنجاب فوڈ اتھارٹی کی فوڈ سیفٹی ٹیم نے ڈی جی فوڈ اتھارٹی کی ہدایات پر حافظ آباد کے جگانوالہ روڈ پر واقع ملک شاپ پر چھاپہ مارا، جہاں ڈیری کریم کا معیار مقررہ اصولوں کے مطابق نہ ہونے اور لیبارٹری سیمپل فیل ہونے پر کارروائی عمل میں لائی گئی۔
فوڈ اتھارٹی نے ملک شاپ بند کرکے مقدمہ درج کر لیا جبکہ ایک ملزم کو موقع سے گرفتار کر لیا گیا۔ ترجمان کے مطابق پنجاب بھر میں ملاوٹ کے خاتمے اور شہریوں کو معیاری خوراک کی فراہمی کے لیے کارروائیاں جاری ہیں۔
