لاہور (پنجاب پوسٹ) امیر جماعت اسلامی پاکستان حافظ نعیم الرحمان نے استنبول میں اخوان المسلمون کے عالمی مرشد عام صلاح عبدالحق اور مرکزی قیادت سے ملاقات کی، جس میں امت مسلمہ کو درپیش چیلنجز، مشرق وسطیٰ کی صورتحال اور پاک افغان کشیدگی سمیت اہم علاقائی و عالمی امور پر تفصیلی تبادلہ خیال کیا گیا۔
ملاقات کے دوران امریکا اور اسرائیل کی خطے میں جارحیت، ایران اور خلیجی ممالک کی صورتحال جبکہ فلسطین کے حالات اور امریکی و اسرائیلی پالیسیوں کے اثرات کا بھی جائزہ لیا گیا۔ دونوں جانب سے موجودہ عالمی و علاقائی حالات میں مسلم دنیا کے درمیان اتحاد، یکجہتی اور مشترکہ حکمت عملی اپنانے کی ضرورت پر زور دیا گیا۔
ملاقات میں مسلم نوجوانوں کی دینی وابستگی، اعلیٰ کردار اور فکری و اخلاقی تربیت کو بھی ناگزیر قرار دیا گیا۔ قائدین نے اس بات پر اتفاق کیا کہ مسلم نوجوانوں کی مثبت فکری اور اخلاقی تربیت کے لیے مؤثر اقدامات ضروری ہیں۔
اس موقع پر جماعت اسلامی اور اخوان المسلمون کے درمیان باہمی روابط مزید مضبوط بنانے اور دونوں تحریکوں کے تنظیمی، تحریکی اور فکری تجربات سے استفادہ کرنے کے عزم کا اظہار کیا گیا۔
ملاقات میں امت مسلمہ کے اجتماعی مسائل کے حل اور اسلامی تحریکوں کے درمیان تعاون کو فروغ دینے کے لیے رابطوں کا سلسلہ مسلسل جاری رکھنے پر بھی اتفاق کیا گیا۔
