لاہور (پنجاب پوسٹ) پنجاب پبلک سروس کمیشن (پی پی ایس سی) کے زیر اہتمام مختلف محکموں کی 216 آسامیوں کے لیے 31 ہزار 788 امیدواروں کے تحریری امتحانات پنجاب بھر میں جاری ہیں۔
چیئرمین پی پی ایس سی لیفٹیننٹ جنرل ریٹائرڈ محمد عبدالعزیز، کمیشن کے ممبران اور سیکرٹری افضال احمد نے صوبے بھر میں قائم امتحانی مراکز کے دورے کیے۔ چیئرمین نے امتحانی مراکز کا تفصیلی معائنہ کیا، امیدواروں سے ملاقات کی اور ان کے مسائل سنے۔ انہوں نے امتحانی عمل کے بہترین انعقاد کے لیے متعلقہ افسران کو ضروری ہدایات بھی جاری کیں۔
کمیشن کے ممبران نے مختلف شہروں میں امتحانی مراکز کا جائزہ لیا۔ ممبر احمد علی کمبوہ نے راولپنڈی، ڈاکٹر ارشاد احمد نے فیصل آباد، جبکہ محمد صدیق شیخ نے ملتان اور ڈیرہ غازی خان کے مراکز کا دورہ کیا۔ اسی طرح ممبر عامر یاسین نے بہاولپور، محمد مسعود انور نے لاہور اور ڈاکٹر ذوالفقار علی چوہدری نے سرگودھا کے امتحانی مراکز کا معائنہ کیا۔
دوروں کے دوران ممبران نے امیدواروں کے لیے فراہم کی گئی سہولیات کے ساتھ ساتھ انتظامی اور سکیورٹی اقدامات کا بھی جائزہ لیا۔ پنجاب پبلک سروس کمیشن کے ڈائریکٹرز نے ممبران کو امتحانی انتظامات کے بارے میں بریفنگ دی۔
کمیشن کے مطابق امتحانی عمل کی شفافیت، نظم و ضبط اور پُرامن انعقاد کو یقینی بنانے کے لیے مؤثر انتظامات کیے گئے ہیں۔
