شیخوپورہ (پنجاب پوسٹ)فاروق آباد میں 50 ہزار روپے قرض کی قسط کی عدم ادائیگی کے معاملے پر مائیکرو فنانس بینک کے عملے کی مبینہ غنڈہ گردی کا افسوسناک واقعہ پیش آیا، جہاں بینک عملے کی جانب سے خاتون کو گھر سے دفتر منتقل کرکے مبینہ طور پر حبسِ بے جا میں رکھنے کا الزام سامنے آیا ہے۔
ذرائع کے مطابق خاتون کے شوہر اختر نے بینک عملے سے منت سماجت کی، تاہم مبینہ طور پر اسے دھکے دے کر دفتر سے باہر نکال دیا گیا۔ واقعے سے دلبرداشتہ ہو کر اختر نے بینک کے باہر زہریلی گولیاں کھا لیں، جس کے نتیجے میں اس کی حالت تشویشناک ہوگئی اور وہ جانبر نہ ہو سکا۔
زہر خورانی سے جاں بحق ہونے والے محنت کش اختر کی لاش پوسٹ مارٹم کے لیے منتقل کر دی گئی۔
واقعے کا نوٹس لیتے ہوئے تھانہ سٹی پولیس نے کارروائی کرتے ہوئے نامزد ملزمان حسنین شاہ اور سعدیہ کو گرفتار کر لیا ہے۔
پولیس کے مطابق ملزمان کے خلاف قانونی کارروائی شروع کر دی گئی ہے اور واقعے کی تحقیقات جاری ہیں، انصاف کی فراہمی یقینی بنائی جائے گی۔
