لاہور: ( پنجاب پوسٹ ) لاہور ہائی کورٹ نے پنجاب کے تمام سرکاری اسپتالوں میں پرچی سسٹم ختم کرنے کا حکم دے دیا ہے۔ عدالت نے ہدایت کی کہ یہ نظام چار ہفتوں کے اندر ختم کیا جائے۔
عدالت نے حکم دیا کہ مریضوں کو علاج کے لیے رجسٹریشن کاؤنٹرز پر پرچی لینے اور لمبی قطاروں میں کھڑے ہونے سے نجات دلائی جائے۔ ایمرجنسی اور او پی ڈی مریضوں کو پرچی کے بغیر فوری طبی امداد فراہم کرنے کی ہدایت بھی کی گئی۔
عدالت نے پنجاب کے سرکاری اسپتالوں میں جدید ٹیکنالوجی پر مبنی مریضوں کی رجسٹریشن کا نظام متعارف کرانے کا حکم دیا۔ عدالت کا کہنا تھا کہ پرچی سسٹم ختم کرنے کے لیے مؤثر اقدامات کیے جائیں۔
عدالت نے پنجاب کے سرکاری اسپتالوں میں بنیادی طبی سہولیات کی فراہمی سے متعلق جامع رپورٹ بھی طلب کر لی۔ حکومت پنجاب سے چار ہفتوں میں پرچی سسٹم ختم کر کے عمل درآمد رپورٹ پیش کرنے کو کہا گیا ہے۔ عدالت نے خبردار کیا کہ عدالتی احکامات پر عمل درآمد نہ کرنے کی صورت میں متعلقہ افسران کے خلاف کارروائی کی جائے گی۔
