کھاریاں(پنجاب پوسٹ)سرائے عالمگیر کے نواحی گاؤں دندی کلیال کے رہائشی، پاک فوج کے لانس نائیک اور ایس ایس جی کمانڈو غلام مرتضیٰ وزیرستان میں دہشت گردوں کے خلاف آپریشن کے دوران وطن پر قربان ہو گئے اور جام شہادت نوش کر گئے۔
شہید کا جسد خاکی جب آبائی گاؤں دندی کلیال پہنچا تو فضا سوگوار ہو گئی اور ہر آنکھ اشکبار تھی۔ شہید کا استقبال کرنے کے لیے اہل علاقہ کی بڑی تعداد پہلے سے موجود تھی۔ لوگوں نے پاکستان زندہ باد اور پاک فوج زندہ باد کے نعرے لگائے اور شہید کو خراج عقیدت پیش کیا۔
یہ بھی پڑھیں:سابق آرمی چیف جنرل (ر) عبدالوحید کاکڑ انتقال کر گئے
لانس نائیک غلام مرتضیٰ نے اپنی جان وطن پر قربان کر دی لیکن وطن پر آنچ نہ آنے دی۔ نماز جنازہ کی ادائیگی کے بعد شہید کو مکمل فوجی اعزاز کے ساتھ آبائی قبرستان میں سپرد خاک کر دیا گیا۔ نماز جنازہ میں پاک فوج کے افسران و جوانوں، سیاسی و سماجی شخصیات اور اہل علاقہ کی کثیر تعداد نے شرکت کی۔
شہید کے لواحقین نے کہا کہ ہمیں اپنے بیٹے کی شہادت پر فخر ہے۔ ان کا کہنا تھا کہ وطن کی حفاظت کے لیے دی جانے والی قربانی ہمارے خاندان کے لیے باعثِ عزت ہے۔
