لاہور (پنجاب پوسٹ) تعلیمی اداروں کے باہر طالبات کو ہراساں کرنے اور طلبہ پر دھونس جمانے کا معاملہ سامنے آگیا، شاد باغ پولیس نے طالبات کو ہراساں کرنے، طلبہ کو تشدد کا نشانہ بنانے اور سکول انتظامیہ کو جان سے مارنے کی دھمکیاں دینے کے الزام میں دو ملزمان کو گرفتار کر لیا۔
ترجمان ڈی آئی جی آپریشنز کے مطابق گرفتار ملزمان کی شناخت بلال اور ارسلان کے نام سے ہوئی ہے۔ ملزمان پر تعلیمی ادارے کے باہر طالبات کو ہراساں کرنے کا الزام ہے۔ چھیڑ چھاڑ سے منع کرنے پر ملزمان نے طلبہ کو تشدد کا نشانہ بنایا اور سکول انتظامیہ سمیت طلبہ کو جان سے مارنے کی دھمکیاں دیں۔
ترجمان کے مطابق سکول انتظامیہ کی شکایت پر شاد باغ پولیس نے مقدمہ درج کرکے دونوں ملزمان کو گرفتار کیا، جبکہ واقعے میں ملوث دیگر ملزمان کی گرفتاری کے لیے پولیس کی کارروائیاں جاری ہیں۔
یہ بھی پڑھیں: خواتین کو تشدد کا نشانہ بنانے کے الزام میں ملوث ملزم پولیس کے ہاتھوں گرفتار
ڈی آئی جی آپریشنز فیصل کامران کا کہنا ہے کہ لاہور میں بدمعاشی، غنڈہ گردی اور اوباش عناصر کے لیے کوئی جگہ نہیں۔ تعلیمی اداروں کے باہر طالبات کو ہراساں کرنے والوں سے سختی سے نمٹا جائے گا، جبکہ شہریوں پر دھونس جمانے اور خوف و ہراس پھیلانے والوں کو قانون کے کٹہرے میں لایا جائے گا۔
فیصل کامران کے مطابق طالبات کا تحفظ اور تعلیمی اداروں کے اطراف پُرامن ماحول کی فراہمی پولیس کی اولین ترجیح ہے۔
