لاہور (پنجاب پوسٹ) ڈی آئی جی آپریشنز فیصل کامران کی کھلی کچہری میں انصاف کی اپیل کرنے والی خاتون کی درخواست پر کارروائی کرتے ہوئے مغلپورہ پولیس نے پنشن کے نام پر فراڈ کرنے والے ملزم عبدالرحمان کو گرفتار کر لیا۔
متاثرہ خاتون کے والد کی وفات کے بعد پنشن ہی ان کا واحد ذریعہ معاش تھی، جس کے لیے انہوں نے ملزم سے مدد لی۔ ملزم نے خاتون کا اصل شناختی کارڈ اور دیگر دستاویزات حاصل کرکے ان کے نام پر خفیہ طور پر دوسرا بینک اکاؤنٹ کھلوایا اور پنشن کی 12 لاکھ روپے کی رقم اس اکاؤنٹ میں منتقل کروا لی۔
خاتون نے ڈی آئی جی آپریشنز کی کھلی کچہری میں فراڈ کی روداد سناتے ہوئے انصاف کی اپیل کی، جس پر معاملے کی جانچ کے بعد مقدمہ درج کرکے ملزم کو گرفتار کر لیا گیا۔ پولیس نے ملزم کے قبضے سے 5 لاکھ روپے نقدی برآمد کر لی ہے جبکہ باقی رقم کی برآمدگی کے لیے کارروائی جاری ہے۔
ڈی آئی جی آپریشنز فیصل کامران نے شہریوں کو ہدایت کی ہے کہ پنشن اور مالی معاملات کے لیے متعلقہ اداروں سے براہِ راست رجوع کریں اور نوسربازوں و ٹاؤٹوں کے جھانسے میں آکر اپنی جمع پونجی سے محروم نہ ہوں
