لاہور میں غیر قانونی بس اڈوں کے خلاف کریک ڈاؤن، اکتوبر میں 2700 سے زائد چالان، مقدمات کا بھی حکم

لاہور (پنجاب پوسٹ) شہر میں غیر قانونی بس اڈوں، روڈ سائیڈ پارکنگ اسٹینڈز اور ہورڈنگ پوائنٹس کے خلاف کریک ڈاؤن کا حکم دے دیا گیا۔ سی ٹی او لاہور سید عبدالرحیم شیرازی نے 32 چوک، شاہدرہ، لاری اڈہ اور راوی روڈ کا دورہ کیا اور غیر قانونی بس اڈوں کے خلاف فوری کارروائی کی ہدایت کی۔

سی ٹی او لاہور نے غیر قانونی ہورڈنگ پوائنٹس پر بسیں کھڑی کرنے اور سواریاں اتارنے یا چڑھانے پر مقدمات درج کرنے کا حکم دیا۔ انہوں نے واضح کیا کہ غیر قانونی بس اڈوں کی شکایت پر متعلقہ سیکٹر انچارج، ڈیوٹی افسر اور پٹرولنگ افسر کے خلاف بھی کارروائی ہوگی۔

ٹریفک پولیس کے مطابق رواں سال غیر قانونی ہورڈنگ پوائنٹس پر بسیں روکنے کے معاملے میں 31 مقدمات درج کیے جا چکے ہیں، جبکہ اکتوبر کے دوران غیر قانونی بس اسٹینڈز اور ہولڈنگ پوائنٹس پر 2700 سے زائد چالان ٹکٹس جاری کیے گئے۔

یہ بھی پڑھیں: ٹریفک پولیس کی سختی کام آگئی، 99 فیصد لاہوریوں نے ہیلمٹ پہن لیا ،98 فیصد لاہور لین اور لائن پر آگئے

سی ٹی او لاہور نے بس ڈرائیورز کے لیے ایچ ٹی وی (HTV) اور پی ایس وی (PSV) ڈرائیونگ لائسنس لازمی قرار دیتے ہوئے بغیر پی ایس وی لائسنس بسیں چلانے والے ڈرائیورز کے خلاف مقدمات درج کرنے کا حکم بھی دیا۔

سید عبدالرحیم شیرازی کا کہنا تھا کہ شہر میں غیر قانونی بس اسٹینڈز اور ہورڈنگ پوائنٹس کی ہرگز اجازت نہیں دی جائے گی۔ ٹریفک کی روانی متاثر کرنے والے غیر قانونی اڈوں کے خلاف بلاامتیاز کارروائی جاری رہے گی۔