لاہور (پنجاب پوسٹ) پنجاب ٹریفک پولیس نے ون وے کی خلاف ورزی کرنے والوں کے خلاف سخت کارروائی کا فیصلہ کرتے ہوئے صوبہ بھر میں زیرو ٹالرنس پالیسی نافذ کر دی ہے۔ ڈی آئی جی ٹریفک پنجاب محمد وقاص نذیر نے ون وے کی خلاف ورزی کرنے والوں کے خلاف سخت کارروائی کی ہدایات جاری کر دی ہیں۔
ترجمان ٹریفک پولیس کے مطابق رواں سال صوبہ بھر میں ون وے کی خلاف ورزی پر 5 لاکھ سے زائد شہریوں کے چالان کیے گئے، جبکہ لاہور میں ایک لاکھ 81 ہزار سے زائد چالان کیے جا چکے ہیں۔
ترجمان کے مطابق پنجاب میں 4 فیصد مہلک ٹریفک حادثات ون وے کی خلاف ورزی کے باعث پیش آئے۔ خلاف ورزیوں کی روک تھام کے لیے سیف سٹی کیمروں کے ذریعے نگرانی جاری ہے، جبکہ خصوصی ٹیمیں بھی تشکیل دے دی گئی ہیں۔
ڈی آئی جی ٹریفک پنجاب محمد وقاص نذیر نے کہا کہ ٹریفک قوانین کی خلاف ورزی کسی صورت برداشت نہیں کی جائے گی۔ ٹریفک پولیس کا مقصد صرف چالان کرنا نہیں بلکہ قیمتی جانوں کا تحفظ یقینی بنانا ہے۔
انہوں نے شہریوں سے اپیل کی کہ حادثات کی روک تھام اور محفوظ سفر کے لیے ٹریفک قوانین کی پابندی کریں تاکہ اپنی اور دوسروں کی زندگیوں کو محفوظ بنایا جا سکے۔
