لاہور (پنجاب پوسٹ) ڈی آئی جی آپریشنز کی ہدایت پر پتنگ فروشوں کے خلاف کریک ڈاؤن جاری ہے۔ نیو انارکلی پولیس نے خواتین کے کپڑوں کی مارکیٹ میں پتنگوں اور ممنوعہ ڈور کی سپلائی لانے والے دو ملزمان کو گرفتار کر لیا۔
ایس پی سٹی ارشد حیات کانجو کے مطابق ملزمان شاکر اور عثمان نیو انارکلی کے لیڈیز بازار میں پتنگوں کی سپلائی لے کر پہنچے تھے، جہاں پولیس نے کارروائی کرتے ہوئے انہیں گرفتار کر لیا۔
پولیس نے ملزمان کے قبضے سے لاکھوں روپے مالیت کی 2 ہزار تیار پتنگیں اور ممنوعہ ڈور کی 20 چرخیاں برآمد کر لیں۔ ملزمان پابندی کے باوجود خفیہ طور پر پتنگوں کی خرید و فروخت کا دھندا کر رہے تھے۔
ایس پی سٹی ارشد حیات کانجو کے مطابق ملزمان پتنگوں کی ترسیل کے لیے رکشے اور توڑوں کا استعمال کرتے تھے تاکہ پتنگیں ایک جگہ سے دوسری جگہ پہنچائی جا سکیں۔
پتنگ فروشی کے خلاف کامیاب کارروائی پر ایس پی سٹی نے ایس ایچ او نیو انارکلی سمیت پولیس ٹیم کو شاباش دی۔ ان کا کہنا تھا کہ پتنگ بازی اور پتنگ فروشی کی روک تھام کے لیے کڑی نگرانی کی جا رہی ہے۔
