لاہور(پنجاب پوسٹ)پنجاب میں پرائیویٹ گاڑی مالکان کے لیے بڑی خوشخبری سامنے آ گئی ہے۔ فٹنس چیکنگ مراکز پر لگنے والی لمبی قطاروں اور شدید رش کو مدنظر رکھتے ہوئے حکومت نے شہریوں کو بڑا ریلیف دے دیا ہے۔ پنجاب ٹرانسپورٹ اتھارٹی نے گاڑیوں کے فٹنس سرٹیفکیٹ بنوانے کی آخری تاریخ میں توسیع کر دی ہے۔ پہلے یہ ڈیڈ لائن 15 نومبر مقرر تھی، تاہم اب اسے بڑھا کر 31 دسمبر کر دیا گیا ہے، یوں گاڑی مالکان کو مزید ڈیڑھ ماہ کی مہلت مل گئی ہے۔
اتھارٹی کے مطابق نسبتاً نئی گاڑیوں کو فٹنس سرٹیفکیٹ کی شرط سے مستثنیٰ قرار دیا گیا ہے۔ ایک ہزار سی سی تک کی پانچ سال تک پرانی گاڑیوں کو فٹنس سرٹیفکیٹ سے استثنیٰ حاصل ہوگا، جبکہ ایک ہزار سے دو ہزار سی سی تک کی چھ سال تک پرانی گاڑیاں بھی اس شرط سے مستثنیٰ ہوں گی۔ اسی طرح دو ہزار سی سی سے اوپر کی سات سال تک پرانی گاڑیوں کو بھی فٹنس سرٹیفکیٹ کی ضرورت نہیں ہوگی۔
یہ بھی پڑھیں:لاہور ٹریفک پولیس کی بڑی کارروائیاں، 9 ماہ میں 10 لاکھ چالان کر دئیے
شہریوں کی جانب سے اس فیصلے کو سراہا جا رہا ہے، کیونکہ فٹنس سینٹرز پر روزانہ سینکڑوں گاڑیاں پہنچنے سے رش اور انتظار کے مسائل بڑھ گئے تھے۔ توسیع کے بعد اب مالکان اطمینان سے اپنی گاڑیوں کی چیکنگ کروا سکیں گے۔
