لاہور (پنجاب پوسٹ) لاہور ہائیکورٹ نے ریٹائرڈ سرکاری ملازمین کے حق میں اہم فیصلہ دیتے ہوئے قرار دیا ہے کہ ریٹائرمنٹ کے دو سال بعد محکماتی انکوائری خود بخود ختم ہو جاتی ہے۔ عدالت کے مطابق دو سال کی مدت پوری ہونے پر انکوائری کا ختم ہونا ملازم کا قانوناً حاصل شدہ حق ہے۔
جسٹس مزمل اختر شبیر نے سابق سی ای او ہیلتھ نارووال ڈاکٹر خالد جاوید کی درخواست منظور کرتے ہوئے پیڈا ایکٹ کے تحت جاری انکوائری اور پینشن روکنے کا حکم کالعدم قرار دے دیا۔ عدالت نے پنجاب حکومت کو حکم دیا کہ ڈاکٹر خالد جاوید کی روکی گئی پینشن اور تمام واجبات فوری طور پر ادا کیے جائیں۔
فیصلے کے مطابق محکمہ صحت نے 2022 سے زیر التوا انکوائری کی بنیاد پر سابق سی ای او کی پینشن روک رکھی تھی۔ عدالت نے قرار دیا کہ انکوائریز وقت پر مکمل نہ ہونے کا خمیازہ ریٹائرڈ ملازم نہیں بھگت سکتا۔
عدالت نے واضح کیا کہ پیڈا ایکٹ میں 25 فروری 2026 کی ترمیم کا ماضی سے اطلاق نہیں ہو سکتا۔ ترمیمی قانون کا اطلاق مستقبل کے معاملات پر ہوگا، ماضی کے بند شدہ کیسز پر نہیں، اور اگر قانون میں واضح ذکر نہ ہو تو نئی ترمیم کو ماضی سے لاگو نہیں کیا جا سکتا۔ اس بنا پر ترمیم کے باوجود پرانے کیسز ختم تصور ہوں گے، اور ریٹائرمنٹ کے دو سال بعد انکوائری ختم ہونے کا قانون برقرار ہے۔
لاہور ہائیکورٹ نے اس اہم قانونی نقطے پر اپنے فیصلے کو عدالتی نظیر بھی قرار دیا ہے۔
