لاہور(پنجاب پوسٹ) ڈی آئی جی آپریشنز فیصل کامران کی کھلی کچہری میں وراثتی تنازعات، ہراسگی، گھریلو جھگڑوں، فراڈ، دھمکیوں اور قبضہ مافیا سے متعلق شہریوں کی متعدد شکایات سامنے آگئیں۔ ڈی آئی جی آپریشنز نے شہریوں کی شکایات پر موقع پر احکامات جاری کرتے ہوئے متعلقہ ایس ایچ اوز کو فوری قانونی کارروائی اور پیش رفت رپورٹ کرنے کی ہدایت کردی۔
ڈی آئی جی آپریشنز فیصل کامران نے وراثتی تنازعات میں فریقین کے درمیان تصادم سے بچنے اور معاملات کو قانون کے مطابق حل کرنے کی ہدایت کی۔ انہوں نے خواتین، بزرگ شہریوں اور خصوصی افراد کی شکایات کو ترجیحی بنیادوں پر نمٹانے کا حکم دیتے ہوئے کہا کہ فراڈ، دھمکیوں اور قبضہ مافیا سے متعلق شکایات پر بھی فوری قانونی کارروائی کی جائے۔
فیصل کامران نے واضح کیا کہ قابلِ دست اندازی جرم کی صورت میں بلا تاخیر مقدمہ درج کرکے تفتیش شروع کی جائے۔ ہراسگی، تشدد اور سماجی جرائم کے خلاف زیرو ٹالرنس پالیسی پر عمل کیا جا رہا ہے اور قانون کا بلاامتیاز نفاذ یقینی بنایا جا رہا ہے۔
یہ بھی پڑھیں: لاہور ٹریفک پولیس کا سموگ کے پیش نظر بڑا اقدام، روزانہ کی بنیاد جنرل ہولڈ اپ
ڈی آئی جی آپریشنز کا کہنا تھا کہ شہریوں کی جان و مال کے تحفظ اور انصاف کی بروقت فراہمی پر کوئی سمجھوتہ نہیں ہوگا۔ کھلی کچہری میں جاری احکامات پر عملدرآمد کی باقاعدہ مانیٹرنگ کی جائے گی جبکہ شکایات کے ازالے میں کوتاہی کرنے والے ایس ایچ اوز کی براہِ راست جوابدہی ہوگی۔
انہوں نے کہا کہ لاہور پولیس کا مقصد صرف مقدمہ درج کرنا نہیں بلکہ متاثرین کو بروقت انصاف فراہم کرنا ہے۔ شہری ہفتے میں چھ روز دوپہر ایک سے تین بجے تک براہِ راست کھلی کچہری میں اپنے مسائل پیش کر سکتے ہیں۔ شہریوں نے کھلی کچہری کو فوری شنوائی اور مؤثر قانونی معاونت کا پلیٹ فارم قرار دیا۔
