لاہور(پنجاب پوسٹ) پنجاب سیف سٹیز اتھارٹی کے مطابق ورچوئل ویمن پولیس اسٹیشن نے ستمبر 2026 کے دوران 41 ہزار 903 کیسز میں خواتین کو فوری مدد اور قانونی رہنمائی فراہم کی۔ ترجمان سیف سٹیز کا کہنا ہے کہ صنفی جرائم، ہراسانی اور تشدد کا شکار خواتین کو تحفظ اور انصاف کی فراہمی کے لیے زیرو ٹالرنس پالیسی پر عمل کیا جا رہا ہے۔
اعداد و شمار کے مطابق خواتین کے خلاف مختلف جرائم پر ایک ہزار 916 مقدمات درج کیے گئے، جبکہ 248 کیسز میں انکوائری جاری ہے۔ اسی عرصے میں گھریلو تشدد کے 20 ہزار 572 کیسز رپورٹ ہوئے، جن میں سے 20 ہزار 107 کیسز سیف سٹی کی معاونت سے حل کیے گئے۔
ترجمان کے مطابق ورچوئل ویمن پولیس اسٹیشن خواتین کو ایف آئی آر کے اندراج سے لے کر تفتیش اور ٹرائل تک تمام مراحل میں رہنمائی فراہم کر رہا ہے۔ متاثرہ خواتین کے لیے پوسٹ ایف آئی آر فالو اپ سروس، کیس ٹریکنگ پورٹل اور ایف آئی آر سے متعلق معاونت کی سہولیات بھی دستیاب ہیں۔ خواتین اپنا نام اور پتہ ظاہر کیے بغیر بھی اپنے مسائل شیئر کر سکتی ہیں۔
ترجمان نے بتایا کہ پنجاب بھر سے خواتین روزانہ ورچوئل ویمن پولیس اسٹیشن سے رابطہ کر کے مدد حاصل کر رہی ہیں۔ خواتین ایمرجنسی ہیلپ لائن 15 اور ویمن سیفٹی ایپ کے لائیو چیٹ اور ویڈیو کال فیچرز کے ذریعے بھی مدد لے سکتی ہیں۔
ہراسانی، گھریلو تشدد یا کسی بھی ہنگامی صورتحال میں ورچوئل ویمن پولیس اسٹیشن سے رابطے کے لیے 15 ڈائل کر کے 2 دبائیں۔
