لاہور (پنجاب پوسٹ) لاہور ہائیکورٹ کے احاطہ عدالت میں موبائل فون سے ویڈیوز، تصاویر بنانے اور ٹک ٹاک سمیت کسی بھی قسم کی ریکارڈنگ پر پابندی عائد کردی گئی۔
چیف جسٹس عالیہ نیلم کی منظوری کے بعد پابندی کا نوٹیفکیشن جاری کردیا گیا۔ نوٹیفکیشن کے مطابق عدالتی احاطے، راہ داریوں، انتظار گاہوں اور دفاتر میں موبائل فون سے ویڈیو یا تصاویر بنانے کی اجازت نہیں ہوگی۔
پابندی کا اطلاق وکلا، پولیس اہلکاروں، صحافیوں، سائلین اور دیگر تمام افراد پر ہوگا۔ خلاف ورزی کی صورت میں ریکارڈنگ کے لیے استعمال ہونے والا موبائل فون ضبط کیا جا سکے گا، جبکہ قانون کے مطابق سخت کارروائی بھی کی جائے گی۔
رجسٹرار عبدالرحیم نے سرکلر پر سختی سے عملدرآمد یقینی بنانے کی ہدایت کردی ہے۔ تاہم صحافیوں کے لیے مختص مخصوص جگہ کو ریکارڈنگ کی پابندی سے مستثنیٰ قرار دیا گیا ہے۔
