لاہور(پنجاب پوسٹ) نیو انارکلی پولیس نے ضلع کچہری سے شہری کو یرغمال بنانے کی شکایت پر فوری کارروائی کرتے ہوئے مغوی غلام عباس کو اسلام پورہ سے بحفاظت بازیاب کرا لیا، جبکہ جاوید خان سمیت تین ملزمان کو موقع سے گرفتار کر لیا گیا۔
پولیس کے مطابق ملزمان غلام عباس کو ضلع کچہری سے زبردستی اپنے ساتھ لے گئے تھے اور اس کے بھائی سے 2 لاکھ 50 ہزار روپے کا مطالبہ کیا۔ ابتدائی تفتیش میں انکشاف ہوا ہے کہ ملزمان کا مغوی کے ساتھ قسطوں کی رقم کا تنازع چل رہا تھا۔ گرفتار ملزمان کو تھانے منتقل کر کے مزید تفتیش شروع کر دی گئی ہے۔
ڈی آئی جی آپریشنز فیصل کامران نے کہا کہ قسطوں کے کاروبار کی آڑ میں شہریوں کو ہراساں کرنا کسی صورت برداشت نہیں کیا جائے گا۔ ان کا کہنا تھا کہ سودی لین دین یا رقم کی وصولی کے معاملات میں کسی کو قانون ہاتھ میں لینے کی اجازت نہیں دی جائے گی۔
انہوں نے شہریوں سے اپیل کی کہ وہ اپنے مالی معاملات قانون کے دائرے میں رہ کر حل کریں۔
