لاہور (پنجاب پوسٹ) خبردار، ہوشیار، آج شہر بھر میں بغیر ہیلمٹ موٹرسائیکل سواروں کےخلاف جنرل ہولڈ اپ ہوگا،بغیر ہیلمٹ کوئی موٹرسائیکل شہر میں داخل نہیں ہوگا
سی ٹی او لاہور نے کہا کہ مال روڈ، جیل روڈ،کینال روڈ،مین بلیوارڈ روڈ پر موٹرسائیکلسٹ کو چلنے کی ہرگز اجازت نہیں ہوگی۔ایس پیز اور ڈی ایس پی پیز کو شہر کے تمام داخلی راستوں پر خصوصی ٹیمیں تعینات کرنے کا حکم دیا۔
رواں سال بھی 211 جان لیوا حادثات میں سے 127 موٹرسائیکلسٹ جان سے ہاتھ گنوا بیٹھے تھے۔سی ٹی او لاہور سید عبدالرحیم شیرازی نے بتایا کہ سر پر لگنے والی چوٹیں حادثات میں اموات کی بڑی وجہ ہیں اسی لیے سخت انفورسمنٹ کا مقصد ریونیو جنریٹ کرنا نہیں بلکہ شہریوں کی زندگیاں بچانا ہے۔
سی ٹی او لاہور نے بتایا کہ جان لیوا حادثات میں %72 فیصد موٹرسائیکل سوار شامل ہیں لیکن اب ہمیں ان قیمتی جانوں کو محفوظ بنانا ہوگا، صرف لاہور میں ہی 82 لاکھ رجسٹرڈ وہیکلز میں 57 لاکھ سے زائد موٹرسائیکل حادثات میں سرفہرست ہیں۔
سید عبدالرحیم شیرازی نے بتایا کہ سخت ہیلمٹ انفورسمنٹ مہم سے 40 فیصد ہیڈ ٹراما میں کمی ہوئی ہے اور شہریوں کہ ہدایت کی کہ شہری ہیلمٹ حفاظت کےلئے پہنیں ناکہ چالان کے ڈر سے، ہیلمٹ اور لین لائن ڈسپلن آپ کے محفوظ سفر کی ضمانت ہے۔
