لاہور(پنجاب پوسٹ)پنجاب پولیس کی جانب سے صوبے بھر میں مبینہ پولیس مقابلوں کا سلسلہ جاری ہے۔ رواں سال کے ابتدائی 8 ماہ کے دوران مختلف اضلاع میں مجموعی طور پر 1290 مبینہ پولیس مقابلے ہوئے۔
پولیس ریکارڈ کے مطابق ان مقابلوں کے دوران 5 پولیس اہلکار شہید جبکہ 46 زخمی ہوئے۔ دوسری جانب مبینہ مقابلوں میں مجموعی طور پر 402 ملزمان ہلاک ہوئے، جبکہ پولیس کی جوابی کارروائی میں 1128 ملزمان زخمی ہوئے۔
ریکارڈ کے مطابق انہی کارروائیوں کے نتیجے میں 642 ملزموں کو گرفتار بھی کیا گیا۔
پولیس حکام کا کہنا ہے کہ ہلاک، زخمی اور گرفتار ہونے والے ملزمان قتل، اقدامِ قتل، اجتماعی زیادتی اور پولیس مقابلوں کے مقدمات میں مطلوب تھے۔ حکام کے مطابق یہ ملزمان ڈکیتی، اغواء برائے تاوان اور دیگر سنگین وارداتوں میں بھی پولیس کو مطلوب تھے۔
