لاہور(پنجاب پوسٹ)ایکسائز ڈیپارٹمنٹ نے جائیداد کی خرید و فروخت کے لیے این او سی کے حصول کو کوڑا ٹیکس کی وصولی سے مشروط کر دیا ہے، جس کے بعد شہریوں کو اپنی پراپرٹی کی منتقلی سے پہلے کوڑا ٹیکس کے بقایاجات ادا کرنا لازم ہوں گے۔
ذرائع کے مطابق نئی پالیسی کے تحت کوڑا ٹیکس کی ڈیفالٹر پراپرٹی کو این او سی جاری نہیں کیا جائے گا۔ یعنی جب تک متعلقہ جائیداد پر واجب الادا کوڑا ٹیکس ادا نہیں کیا جاتا، ایکسائز ڈیپارٹمنٹ نہ تو این او سی جاری کرے گا اور نہ ہی جائیداد کی خرید و فروخت کا عمل آگے بڑھ سکے گا۔
اس سے قبل این او سی کے اجرا کے لیے صرف پراپرٹی ٹیکس کی ادائیگی کو دیکھا جاتا تھا، اور کوڑا ٹیکس کی ادائیگی کی شرط موجود نہیں تھی۔ اب پراپرٹی ٹیکس کے ساتھ کوڑا ٹیکس کی ادائیگی بھی لازمی قرار دے دی گئی ہے۔
اس فیصلے کا مقصد کوڑا ٹیکس کی وصولی کو یقینی بنانا اور بقایاجات رکھنے والے جائیداد مالکان کو ادائیگی پر مجبور کرنا بتایا جا رہا ہے۔ ماہرین کے مطابق اس اقدام سے ٹیکس وصولی میں اضافہ متوقع ہے، تاہم جائیداد کی خرید و فروخت کرنے والے شہریوں کو سودے سے پہلے اپنے تمام ٹیکس کلیئر کروانا ہوں گے، ورنہ ان کی منتقلی کا عمل رک سکتا ہے۔
