لاہور(پنجاب پوسٹ)بی بی پاکدامن پولیس نے دربار پر آنے والی خواتین کو باتوں میں لگا کر لوٹنے والی ملزمہ کو گرفتار کر لیا ہے۔ پولیس نے سی سی ٹی وی فوٹیج کی مدد سے ملزمہ کا سراغ لگایا اور اسے شاہدرہ سے ٹریس کر کے حراست میں لیا۔
ایس پی سول لائنز کے مطابق ملزمہ نے دربار پر موجود ایک خاتون کو باتوں میں لگایا اور موقع پا کر اس کا قیمتی پرس چوری کر لیا۔ پرس میں 17 ہزار روپے نقدی اور سونے کی بالیاں موجود تھیں۔ واردات کے بعد متاثرہ خاتون نے پولیس سے رابطہ کیا، جس پر تفتیش شروع کی گئی۔
یہ بھی پڑھین:گڑھی شاہو، مزنگ اور ریس کورس پولیس کی مختلف کارروائیاں، 4 شراب فروش گرفتار
پولیس نے علاقے کے سی سی ٹی وی کیمروں کی فوٹیج کا جائزہ لیا، جس سے ملزمہ کی شناخت ہوئی۔ اسی فوٹیج کی مدد سے اس کا پیچھا کر کے اسے شاہدرہ سے گرفتار کیا گیا۔
پولیس کے مطابق گرفتار ملزمہ انیلہ پہلے بھی متعدد خواتین کے ساتھ اسی طرح نوسربازی کی وارداتیں کر چکی ہے۔ ملزمہ کے خلاف مقدمہ درج کر کے اسے مزید تفتیش کے لیے انویسٹی گیشن ونگ کے حوالے کر دیا گیا ہے۔ پولیس کا کہنا ہے کہ ملزمہ سے پوچھ گچھ کی جا رہی ہے اور دیگر وارداتوں کے بارے میں بھی معلومات حاصل کی جائیں گی۔
ایس پی منزہ کرامت نے کہا کہ نوسربازوں اور جرائم پیشہ عناصر کے خلاف بلاامتیاز کریک ڈاؤن جاری رہے گا اور شہریوں کو تحفظ فراہم کرنے کے لیے ہر ممکن اقدامات کیے جائیں گے۔
