مظفرگڑھ(پنجاب پوسٹ) میں ایک غیر معمولی واردات سامنے آئی ہے جس میں پولیس اہلکاروں سمیت متعدد افراد کے ملوث ہونے کا دعویٰ کیا گیا ہے، جن پر مبینہ جعلی ناکہ لگا کر ایک کروڑ 75 لاکھ روپے مالیت کی چاندی اور نقدی لوٹنے کا الزام ہے۔
رپورٹس کے مطابق 9 مئی کو تھرمل بائی پاس کے قریب پولیس وردیوں میں ملبوس چھ افراد نے ایک ٹرک کو مبینہ طور پر روکا، جو ضلع پشین، بلوچستان سے چاندی لے کر ملتان جا رہا تھا۔ الزام ہے کہ تلاشی کے بہانے ٹرک ڈرائیور اور کلینر سے ایک لاکھ روپے سے زائد نقدی اور ٹرک میں موجود تقریباً 18 کلو چاندی چھین لی گئی۔ متاثرہ شہری کی مدعیت میں 17 جولائی کو تھانہ سٹی مظفرگڑھ میں مقدمہ درج کیا گیا۔
ڈی پی او مظفرگڑھ سید غضنفر علی شاہ کے مطابق تحقیقات کے دوران واردات میں ملوث 5 افراد کو گرفتار کیا گیا، جن میں 4 پولیس اہلکار بھی شامل ہیں۔ پولیس نے چوری شدہ پوری 18 کلو چاندی، جس کی مالیت تقریباً ایک کروڑ 75 لاکھ روپے بتائی گئی ہے، برآمد کرنے کا بھی دعویٰ کیا۔
واضح رہے کہ گرفتاری یا مقدمے میں نامزدگی جرم ثابت ہونے کے مترادف نہیں؛ ملزمان کے خلاف حتمی فیصلہ متعلقہ عدالت میں قانونی کارروائی مکمل ہونے کے بعد ہی سامنے آئے گا۔
یہ بھی پڑھیں:نواب ٹاؤن باپ بیٹے کے مبینہ اغوا کا کیس، مرکزی ملزم گرفتار
