لاہور(پنجاب پوسٹ)ٹریفک قوانین کی خلاف ورزیوں کے خلاف کریک ڈاؤن کے دوران ایسی موٹرسائیکل پکڑی گئی جس کے ذمہ 104 ای چالان نکل آئے۔ موٹرسائیکل پر مجموعی طور پر 1 لاکھ 97 ہزار 200 روپے جرمانہ واجب الادا ہے۔
لاہور ٹریفک پولیس کے مطابق اسکیم موڑ پر پٹرولنگ آفیسر علی رضا نے بغیر ہیلمٹ موٹرسائیکل سوار کو روکا اور گاڑی کا ای چالان ریکارڈ چیک کیا تو 104 چالان سامنے آئے۔ ریکارڈ کے مطابق موٹرسائیکل سوار نے 98 مرتبہ بغیر ہیلمٹ موٹرسائیکل چلائی جبکہ 5 مرتبہ لین لائن کی خلاف ورزی کی۔
ٹریفک پولیس نے موٹرسائیکل کو تھانے بند کر دیا ہے جبکہ ای چالان اور ڈیجیٹل چالان کے نادہندگان کے خلاف کریک ڈاؤن جاری رکھنے کا فیصلہ کیا گیا ہے۔
لاہور ٹریفک پولیس کے مطابق شہر میں 20 سے زائد ٹریفک خلاف ورزیوں پر اے این پی آر کیمروں کی مدد سے ای چالان جاری کیے جا رہے ہیں۔ ای چالان کے نادہندہ سرکاری محکموں کو کلیئرنس کے لیے مراسلے بھی ارسال کیے گئے ہیں۔
ٹریفک پولیس نے شہریوں کو ہدایت کی ہے کہ ای چالان سے بچنے کے لیے ٹریفک قوانین کی پابندی کریں، ہیلمٹ کا استعمال یقینی بنائیں اور لین ڈسپلن برقرار رکھیں۔ اس کے علاوہ نمبر پلیٹس سے چھیڑ چھاڑ کرنے والوں کے خلاف بھی بلاامتیاز کارروائی جاری ہے۔
یہ بھی پڑھیں:پنجاب میں ڈرائیونگ لائسنس حاصل کرنے کا طریقہ تبدیل، شہریوں کو لائسنس کیسے ملیں گے؟
