فیصل آباد(پنجاب پوسٹ)گورنمنٹ کالج یونیورسٹی فیصل آباد (GCUF) کے طلبہ کے تعلیمی ریکارڈ میں رقم کے عوض غیر قانونی ردوبدل کیے جانے کا انکشاف ہوا ہے۔ نیشنل سائبر کرائم انویسٹی گیشن ایجنسی (NCCIA) فیصل آباد نے کارروائی کرتے ہوئے دو ملزمان کو گرفتار کرلیا۔
📊 33 طلبہ کے ریکارڈ میں 72 تبدیلیاں
این سی سی آئی اے کے مطابق تحقیقات کے دوران GCUF کے 33 طلبہ کے تعلیمی ریکارڈ میں مجموعی طور پر 72 غیر قانونی تبدیلیاں سامنے آئیں۔ ریکارڈ میں نمبرز، گریڈز اور حاضری میں مبینہ طور پر ردوبدل کیا گیا۔
💰 فی مضمون 15 ہزار روپے وصول کیے گئے
تحقیقات میں انکشاف ہوا کہ طلبہ سے فی مضمون تقریباً 15 ہزار روپے وصول کرکے ان کے نمبرز اور گریڈز تبدیل کیے جاتے رہے، جبکہ حاضری کے ریکارڈ میں بھی غیر قانونی تبدیلیاں کی گئیں۔
💻 یونیورسٹی پورٹل تک غیر مجاز رسائی
این سی سی آئی اے کے مطابق گرفتار ملزمان میں سابق طالب علم نعمان جعفر بھی شامل ہے، جس نے مبینہ طور پر یونیورسٹی کے HOD آن لائن پورٹل تک غیر مجاز رسائی حاصل کرکے طلبہ کے تعلیمی ریکارڈ میں تبدیلیاں کیں۔
📱 موبائل فونز اور لیپ ٹاپ برآمد
کارروائی کے دوران ملزمان سے دو موبائل فونز اور ایک Dell لیپ ٹاپ برآمد کیا گیا۔ حکام کے مطابق لیپ ٹاپ سے یونیورسٹی کے آن لائن پورٹل تک رسائی اور ریکارڈ میں تبدیلیوں کے اہم شواہد حاصل ہوئے۔
💸 رقم کی منتقلی کا سراغ مل گیا
تحقیقات کے دوران طلبہ کی جانب سے ادا کی جانے والی رقوم کا سراغ JazzCash اکاؤنٹ تک پہنچ گیا۔ این سی سی آئی اے کے مطابق مختلف اکاؤنٹس کے ذریعے رقم منتقل کرکے بعد ازاں کیش آؤٹ کی جاتی رہی۔
⚖️ میرٹ متاثر کرنے والوں کے خلاف کارروائی جاری رہے گی
یہ کارروائی ڈائریکٹر این سی سی آئی اے پنجاب حسام بن اقبال کی خصوصی ہدایات پر کی گئی۔ ان کا کہنا ہے کہ تعلیمی ریکارڈ میں ردوبدل اور میرٹ کو متاثر کرنے والے عناصر کے خلاف بلاامتیاز کارروائیاں جاری رہیں گی۔
