محکمہ اوقاف نے اچانک کرایہ بڑھا دیا، درخواست، ٹیکسوں پر ٹیکس عوام کہاں سے ادا کرے؟ عدالت کا فیصلہ

لاہور(پنجاب پوسٹ)لاہور ہائیکورٹ نے نئی انارکلی میں محکمہ اوقاف کی جانب سے دکان سیل کرنے کے خلاف درخواست پر سماعت کرتے ہوئے دکان ڈی سیل کرنے کا حکم دے دیا۔ عدالت نے درخواست گزار کو کرائے کے واجبات کا 10 فیصد جمع کرانے کی ہدایت بھی کی۔

جسٹس جواد حسن نے رخسانہ پروین کی درخواست پر سماعت کی، درخواست گزار کی جانب سے محمد فیضان سلیم ایڈووکیٹ عدالت میں پیش ہوئے۔ درخواست گزار کے وکیل نے مؤقف اختیار کیا کہ ان کی موکلہ نے محکمہ مسلم اوقاف سے انارکلی میں دکان کرائے پر لے رکھی ہے، تاہم محکمہ اوقاف نے تین سال بعد معمول کے مطابق کرایہ بڑھانے کے بجائے دکان کے رقبے کے حساب سے فی مربع فٹ 250 روپے اضافہ کردیا، جس کے باعث کرائے کے واجبات 45 لاکھ روپے تک پہنچ گئے۔

یہ بھی پڑھیں:پنجاب کے صحافیوں کی جیت، لیسکو لاہور ہائیکورٹ سے بھی ناکام، لیسکو چیف کی ترقی سے متعلق اجلاسوں کے منٹس فراہم کرنے کا حکم

وکیل نے عدالت کو بتایا کہ درخواست گزار قانون کے مطابق تین سال بعد کرائے میں اضافے کی ادائیگی کے لیے تیار ہے، تاہم محکمہ اوقاف کو دکان سیل کرنے کا اختیار حاصل نہیں۔ عدالت سے دکان ڈی سیل کرنے کا حکم جاری کرنے کی استدعا کی گئی۔

عدالت نے ڈی جی اوقاف کو ہدایت کی کہ دکان کے رینٹ، رقبے، معیادِ کرایہ داری اور دیگر شرائط کا جائزہ لے کر معاملے کا فیصلہ کیا جائے۔ عدالت نے درخواست گزار کو واجبات کا 10 فیصد جمع کرانے کا بھی حکم دیا۔

یہ بھی پڑھیں:لاہور پولیس کی بڑی کامیابی، شہر کے مختلف علاقوں میں موبائل چھیننے کے بعد رفو چکر ہونے والا گینگ کیسے پکڑا گیا ؟

سماعت کے دوران جسٹس جواد حسن نے ٹیکسوں کے بڑھتے ہوئے بوجھ پر ریمارکس دیتے ہوئے کہا کہ جتنے ٹیکس لگائے گئے ہیں، انسان کہاں سے کمائے اور ادا کرے؟ بجلی اور گیس کے بلوں میں ٹیکسوں کی بھرمار ہے، ٹیکسوں پر ٹیکس عوام کہاں سے ادا کرے؟ عدالت نے ریمارکس دیے کہ اگر دکاندار کا کاروبار ہی بند کردیا جائے تو وہ کرایہ کہاں سے ادا کرے گا۔