(پنجاب پوسٹ )کرائم کنٹرول ڈیپارٹمنٹ (سی سی ڈی) پنجاب نے ساہیوال ریجن کی ایک سالہ کارکردگی رپورٹ جاری کرتے ہوئے دعویٰ کیا ہے کہ گزشتہ ایک سال کے دوران ساہیوال، اوکاڑہ اور پاکپتن میں سنگین جرائم کی شرح میں نمایاں کمی ریکارڈ کی گئی ہے۔
سی سی ڈی پنجاب کے ترجمان کے مطابق ساہیوال ریجن میں مجموعی طور پر سنگین جرائم کی شرح میں 55 فیصد تک کمی آئی ہے۔ رپورٹ کے مطابق ڈکیتی کے دوران قتل کی وارداتوں میں 33 فیصد جبکہ قتل کے مقدمات میں 48 فیصد کمی ریکارڈ کی گئی۔
ترجمان نے بتایا کہ گزشتہ سال کے مقابلے میں نقب زنی کے واقعات میں 71 فیصد، راہزنی میں 57 فیصد، کار سنیچنگ میں 57 فیصد اور موٹر سائیکل چھیننے کے واقعات میں 36 فیصد کمی واقع ہوئی ہے۔
مزیدپڑھیں؛شیہد پولیس اہلکاروں کے اہل خانہ کیلئے 18 کروڑ 70 لاکھ روپے مالیت کے کتنے گھر تعمیر ہوئے؟
رپورٹ کے مطابق دیگر گاڑیوں کی چھیننے کی وارداتوں میں 57 فیصد، دیگر گاڑیوں کی چوری میں 48 فیصد، کار چوری کے مقدمات میں 48 فیصد اور موٹر سائیکل چوری کی شرح میں بھی 48 فیصد کمی ریکارڈ کی گئی ہے۔
ترجمان سی سی ڈی کا کہنا تھا کہ جرائم کی شرح میں یہ نمایاں کمی محکمہ کی مؤثر حکمت عملی اور افسران و اہلکاروں کی شب و روز محنت کا نتیجہ ہے۔ انہوں نے کہا کہ سی سی ڈی کے افسران اور جوان اپنی جانوں کا نذرانہ پیش کرکے پنجاب کو جرائم سے پاک صوبہ بنانے کے لیے بھرپور خدمات انجام دے رہے ہیں۔
ترجمان نے مزید کہا کہ عوام کے تعاون سے سنگین جرائم کے خاتمے کے لیے کارروائیاں آئندہ بھی اسی جذبے کے ساتھ جاری رکھی جائیں گی۔
