لاہور: گھریلو ملازمہ سے مبینہ زیادتی اور ہلاکت، پنجاب اسمبلی میں توجہ دلاؤ نوٹس جمع

لاہور (پنجاب پوسٹ) فرخ جاوید مون کی جانب سے ماڈل ٹاؤن لاہور میں پیش آنے والے مبینہ زیادتی اور ہلاکت کے واقعے پر پنجاب اسمبلی میں توجہ دلاؤ نوٹس جمع کروا دیا گیا ہے۔
توجہ دلاؤ نوٹس کے مطابق واقعہ تھانہ ماڈل ٹاؤن لاہور کی حدود میں پیش آیا جہاں ایک گھریلو ملازمہ کو مالک مکان کے بیٹے اور ڈرائیور کی جانب سے مبینہ طور پر اجتماعی زیادتی کا نشانہ بنایا گیا۔
نوٹس میں کہا گیا ہے کہ مبینہ زیادتی کے بعد متاثرہ ملازمہ حاملہ ہوئی، جس کے بعد اس کا اسقاطِ حمل کرایا گیا۔ بعد ازاں اسقاطِ حمل کے باعث طبی پیچیدگیوں کے سبب متاثرہ لڑکی ہسپتال میں زیر علاج رہنے کے بعد دم توڑ گئی۔

یہ بھی پڑھیں: گھروں اور ہاسٹلز میں چوری کی وارداتیں کرنے والی خاتون گداگر گرفتار

رکن پنجاب اسمبلی فرخ جاوید مون نے سوال اٹھایا ہے کہ کیا یہ درست ہے کہ ہسپتال میں زیر علاج رہنے کے بعد متاثرہ لڑکی ہلاک ہوئی؟ اور اس واقعے میں ملوث افراد کے خلاف اب تک کیا کارروائی کی گئی ہے؟
توجہ دلاؤ نوٹس میں یہ بھی مطالبہ کیا گیا ہے کہ ایوان کو بتایا جائے کہ مقدمے میں ملوث کتنے ملزمان کو گرفتار کیا گیا ہے۔
نوٹس کے مطابق واقعے کا مقدمہ تھانہ ماڈل ٹاؤن لاہور میں درج کیا جا چکا ہے، تاہم تفتیش کی موجودہ صورتحال سے ایوان کو آگاہ کرنے کا مطالبہ کیا گیا ہے۔