ریس کورس پولیس کی بڑی کارروائی، ریکارڈ یافتہ بِلّی ڈکیت گینگ کے 4 ملزمان گرفتار، مسروقہ سامان اور اسلحہ برآمد

لاہور: (پنجاب پوسٹ )ریس کورس پولیس نے کامیاب کارروائی کرتے ہوئے ریکارڈ یافتہ 4 رکنی بِلّی ڈکیت گینگ کے ملزمان کو گرفتار کر لیا۔ پولیس کے مطابق گرفتار ملزمان منصوبہ بندی کے تحت گھروں اور دکانوں پر ڈکیتی کی وارداتیں کرتے تھے اور اسلحہ کے زور پر شہریوں سے نقدی، موبائل فونز اور موٹر سائیکلیں چھیننے میں ملوث تھے۔ایس پی سول لائنز چوہدری اثر علی کے مطابق ریس کورس پولیس کی خصوصی ٹیم نے علاقے میں سرچ آپریشنز اور خفیہ معلومات کی بنیاد پر کارروائی کرتے ہوئے گینگ کے سرغنہ شکیل عرف بِلّی سمیت کبیر، یعقوب اور ارسلان کو گرفتار کیا۔

یہ بھی پڑھیں:چونیاں میں آئس نشے کا بڑھتا ہوا رجحان، لڑکوں کے بعد لڑکیاں بھی لت میں مبتلا

پولیس نے ملزمان کے قبضے سے 2 موٹر سائیکلیں، ایل سی ڈی، لیپ ٹاپ، متعدد موبائل فونز اور ایک پستول بمعہ گولیاں برآمد کر لیں۔ پولیس حکام کے مطابق گرفتار ملزمان کے خلاف لاہور کے مختلف تھانوں میں ڈکیتی اور دیگر جرائم کے متعدد مقدمات پہلے سے درج ہیں۔
ملزمان کے خلاف قانونی کارروائی مکمل کرتے ہوئے مقدمات درج کر لیے گئے ہیں جبکہ مزید تفتیش کے لیے انہیں انویسٹی گیشن ونگ کے حوالے کر دیا گیا ہے تاکہ گینگ کے دیگر ساتھیوں اور مزید وارداتوں کے بارے میں معلومات حاصل کی جا سکیں۔ایس پی سول لائنز چوہدری اثر علی نے کامیاب کارروائی پر پولیس کی خصوصی ٹیم کو شاباش دیتے ہوئے کہا کہ سٹریٹ کرائم کا خاتمہ اور شہریوں کے جان و مال کا تحفظ پولیس کی اولین ترجیحات میں شامل ہے، اور جرائم پیشہ عناصر کے خلاف کارروائیاں بلا امتیاز جاری رہیں گی۔