لاہور: ( پنجاب پوسٹ)پنجاب یونیورسٹی میں آئندہ مالی سال 2026-27 کے بجٹ کی تیاریاں جاری ہیں، جس کے تحت طلباء و طالبات کو مجموعی طور پر 11 ارب 41 کروڑ روپے کی سبسڈی فراہم کی جائے گی۔یونیورسٹی انتظامیہ کے مطابق یہ سبسڈی ادارے کے اپنے وسائل اور حکومتی گرانٹس دونوں سے دی جائے گی۔ تفصیلات کے مطابق پنجاب یونیورسٹی اپنے وسائل سے طلبہ کو 7 ارب 88 کروڑ روپے جبکہ حکومتی گرانٹس کے تحت 3 ارب 53 کروڑ روپے کی سبسڈی فراہم کرے گی۔
یہ بھی پڑؑھیں:اپنی چھت، اپنا گھر پروگرام کو عالمی پذیرائی، ورلڈ بینک کی 100 ملین ڈالر فنڈنگ میں دلچسپی
وائس چانسلر ڈاکٹر محمد علی کے مطابق یونیورسٹی میں ہر طالبعلم پر اوسطاً 1 لاکھ 75 ہزار روپے اضافی خرچ کیا جائے گا، جبکہ حکومتی گرانٹس کے تحت ہر طالبعلم پر اوسطاً 78 ہزار 547 روپے خرچ ہوں گے۔
انہوں نے کہا کہ سرکاری جامعات میں پنجاب یونیورسٹی کا فیس سٹرکچر سب سے کم ہے اور یہ ادارہ کم فیس میں اعلیٰ معیار کی تعلیم فراہم کر رہا ہے۔ ان کا مزید کہنا تھا کہ طلباء و طالبات کو بہترین تعلیمی سہولیات کی فراہمی کو یقینی بنایا جا رہا ہے۔
انتظامیہ کے مطابق بجٹ 2026-27 کا بنیادی مقصد تعلیمی معیار کو مزید بہتر بنانا اور طلبہ کو زیادہ سے زیادہ مالی ریلیف فراہم کرنا ہے
