لاہور(پنجاب پوسٹ)وفاقی وزیر سالک حسین نے واضح کیا ہے کہ انہوں نے اپنے چھوٹے بھائی شافع حسین سے کبھی دوری اختیار نہیں کی اور نہ ہی آئندہ کریں گے۔ شافع حسین کے ایکس (سابق ٹوئٹر) پر جاری بیان کے بعد پیدا ہونے والی سیاسی بحث پر ردِعمل دیتے ہوئے انہوں نے کہا کہ ان کے بھائی ایک خود مختار شخصیت ہیں اور ان کے اپنے آزادانہ خیالات ہیں۔
سالک حسین کا کہنا تھا کہ ہو سکتا ہے شافع حسین کو ایسی معلومات تک رسائی حاصل رہی ہو جن سے وہ خود واقف نہیں ہیں۔ ان کے مطابق شافع حسین نے اپنے بیان میں کبھی وزیراعلیٰ یا پنجاب حکومت کا براہِ راست نام نہیں لیا، تاہم ان کا ماننا ہے کہ اشارہ اس "نظامی بدعنوانی” (systemic corruption) کی طرف تھا جس کے وجود پر سب متفق ہیں۔
انہوں نے زور دیا کہ تمام سیاستدانوں کو زیادہ رواداری کا مظاہرہ کرنا چاہیے اور غلط فہمیوں کو دور کرنے کے لیے آپس میں مل بیٹھ کر بات چیت کرنی چاہیے۔پرویز الٰہی کے دورِ حکومت کے حوالے سے سالک حسین نے پنجاب میں 2003 سے 2008 تک قائم رہنے والی پاکستان مسلم لیگ (ق) کی حکومت کا ذکر کیا، جو پارٹی صدر چوہدری شجاعت حسین کی قیادت میں تھی۔
