لاہور(پنجاب پوسٹ)میں جعلی اور غیر نمونہ نمبر پلیٹس کے خلاف جاری پولیس کریک ڈاؤن کی زد میں اب معروف یوٹیوبر رجب بٹ کی لینڈ کروزر بھی آ گئی۔ سندر پولیس نے این ایف سی پل کے قریب ناکے پر گاڑی روک کر قبضے میں لے لی اور تھانے منتقل کر دی۔
ترجمان ڈی آئی جی آپریشنز کے مطابق چیکنگ کے دوران لینڈ کروزر پر جعلی اور غیر نمونہ نمبر پلیٹ نصب پائی گئی۔ گاڑی چلانے والے ڈرائیور موسیٰ خان سے نمبر پلیٹ کے بارے میں پوچھ گچھ کی گئی، تاہم وہ کوئی تسلی بخش جواب نہ دے سکا۔ اس پر پولیس نے فوری کارروائی کرتے ہوئے ڈرائیور کے خلاف مقدمہ درج کر لیا۔
ابتدائی معلومات کے مطابق یہ لینڈ کروزر معروف یوٹیوبر رجب بٹ کی ملکیت ہے۔ پولیس کا کہنا ہے کہ گاڑی کی ملکیت اور نمبر پلیٹ سے متعلق مزید قانونی کارروائی جاری ہے اور تمام پہلوؤں کی چھان بین کی جا رہی ہے۔
یہ بھی پڑھین؛’اب رجب ہمیں بھی اپنے ساتھ لے جائیں‘ ، ایمان فاطمہ صلح کیلئے پُرامید
کریک ڈاؤن جاری، 1508 مقدمات درج
ڈی آئی جی آپریشنز فیصل کامران نے بتایا کہ لاہور پولیس کا جعلی اور غیر نمونہ نمبر پلیٹس کے خلاف کریک ڈاؤن پوری شدت سے جاری ہے اور اب تک 1508 مقدمات درج کیے جا چکے ہیں۔ ان کا کہنا تھا کہ قانون سب کے لیے برابر ہے اور کسی کو بھی استثنیٰ حاصل نہیں، چاہے گاڑی کسی بھی شخصیت کی ہو۔
انہوں نے مزید کہا کہ جرائم کی روک تھام کے لیے گاڑیوں کی اصل شناخت یقینی بنانا ناگزیر ہے، اسی مقصد کے تحت یہ مہم جاری رکھی جائے گی۔
