لاہور (پنجاب پوسٹ) رائیونڈ میں آٹے کی عدم دستیابی کی شکایات پر اسسٹنٹ کمشنر بابر علی رائے اِن ایکشن آ گئے، پیرا (PERA) کے ایس ڈی او کو فوری طور پر فیلڈ میں متحرک ہو کر صورتحال کا جائزہ لینے اور کارروائی کرنے کے احکامات جاری کر دیے۔
اسسٹنٹ کمشنر رائیونڈ بابر علی رائے نے آٹے کی قلت سے متعلق عوامی شکایات کا سخت نوٹس لیتے ہوئے ہدایت کی کہ مارکیٹوں اور دکانوں کا فوری معائنہ کیا جائے، آٹے کی دستیابی اور سپلائی کا جائزہ لیا جائے، دکانداروں سے معلومات حاصل کی جائیں اور شہریوں سے براہِ راست فیڈبیک لیا جائے۔
یہ بھی پڑھیں: آٹا بلیک میں فروخت کرنے والوں کے خلاف کریک ڈاؤن، دو دکانوں کے لائسنس معطل، جرمانے عائد
بابر علی رائے نے واضح کیا کہ آٹے کی مصنوعی قلت پیدا کرنے، ذخیرہ اندوزی یا ناجائز منافع خوری ثابت ہونے پر بلاامتیاز سخت قانونی کارروائی عمل میں لائی جائے گی۔
اسسٹنٹ کمشنر نے ہدایت کی کہ عوامی شکایات کا فوری ازالہ کیا جائے اور شہریوں کو آٹے کی بلاتعطل فراہمی ہر صورت یقینی بنائی جائے۔
