لاہور (پنجاب پوسٹ) لاہور ہائیکورٹ نے جنگلات سے درختوں کی کٹائی روکنے اور ان کی حفاظت کے حوالے سے اہم فیصلہ جاری کرتے ہوئے محکمہ جنگلات کو درختوں اور نئے پودوں کو بلا تعطل پانی کی فراہمی یقینی بنانے کا حکم دیا ہے۔
جسٹس جواد حسن نے شہری محمد رمیض کی درخواست پر تحریری فیصلہ جاری کیا۔ درخواست گزار نے راولپنڈی کے تحت پری جنگل کی حفاظت کے لیے اقدامات کی استدعا کرتے ہوئے ہائیکورٹ سے رجوع کیا تھا۔ب
عدالت نے اپنے فیصلے میں محکمہ جنگلات کو ہدایت کی کہ جنگل کی زمین کو ناجائز تجاوزات کے لیے استعمال نہ ہونے دیا جائے اور تجاوزات کے خلاف فوری طور پر قانون کے مطابق کارروائی کی جائے۔ محکمے کو جنگل میں گشت کرنے اور پودوں کی نگرانی یقینی بنانے کا بھی حکم دیا گیا۔ فیصلے میں کہا گیا ہے کہ درختوں کی کٹائی اور آگ لگانے والوں کے خلاف بھی کارروائی کی جائے۔
عدالت نے قرار دیا کہ موسمیاتی تبدیلی مستقبل کا خطرہ نہیں بلکہ موجودہ حقیقت ہے، اور آنے والی نسلوں کو موسمیاتی تبدیلیوں کے غضب سے بچانا ہے۔ فیصلے کے مطابق عدالت آنے والی نسلوں کے لیے موسمیاتی تبدیلیاں کم کرنے میں اپنا کردار ادا کرتی ہے۔ جنگلات کو عوام اور ریاست کا اہم ورثہ قرار دیتے ہوئے عدالت نے کہا کہ آئین کے آرٹیکل 9 اور 14 ماحولیاتی تحفظ کا بنیادی حق دیتے ہیں۔
فیصلے میں محکمہ جنگلات اور دیگر فریقین کی جانب سے درختوں کی حفاظت کے لیے کی جانے والی کوششوں کو قابلِ تعریف قرار دیا گیا۔ محکمہ جنگلات نے عدالت کو بتایا کہ وزیراعلیٰ پنجاب کی شجرکاری مہم کے تحت تحت پری جنگل میں 46 ہزار درخت لگائے گئے ہیں۔
