لاہور(پنجاب پوسٹ)اچھرہ پولیس نے میٹرو بس میں چوری کی وارداتیں کرنے والے خواتین کے گروہ کو گرفتار کر لیا ہے۔ پولیس نے انٹیلی جنس بیسڈ کارروائی کرتے ہوئے تینوں خواتین ملزمان کو شمع میٹرو اسٹیشن سے حراست میں لیا۔
ایس پی ماڈل ٹاؤن اسد علی کے مطابق تینوں خواتین ملزمان میٹرو بس میں سوار ایک خاتون کا پرس چوری کر کے فرار ہو گئی تھیں۔ اطلاع ملنے پر پولیس نے فوری کارروائی کرتے ہوئے انہیں شمع میٹرو اسٹیشن سے گرفتار کیا۔
ایس پی اسد علی نے بتایا کہ ملزمان میٹرو بس میں سوار خواتین کے موبائل فون اور پرس چوری کرتی تھیں۔ گرفتار خواتین چوری اور گینگ سے متعلق 41 مقدمات میں ریکارڈ یافتہ ہیں۔ ملزمان سے چوری شدہ پرس اور نقدی برآمد کر لی گئی ہے۔
یہ بھی پڑھیں:نواب ٹاؤن کے علاقہ میں اپنی 80سالہ بزرگ والدہ کو قتل کرنے والا سفاک بیٹا گرفتار
پولیس کے مطابق تینوں خواتین ملزمان کو مزید تفتیش کے لیے انویسٹی گیشن ونگ کے حوالے کر دیا گیا ہے، جبکہ ان کے دیگر جرائم اور ساتھیوں کے بارے میں بھی معلومات حاصل کی جا رہی ہیں۔
ایس پی ماڈل ٹاؤن اسد علی کا کہنا تھا کہ عوام کے جان و مال کی حفاظت پولیس کی اولین ترجیح ہے اور جرائم پیشہ عناصر کے خلاف کارروائیاں جاری رہیں گی۔
