لاہور (پنجاب پوسٹ) میڈیا سے گفتگو کرتے ہوئے گورنر پنجاب سردار سلیم حیدر خان نے کہا ہے کہ پی ٹی آئی کے احتجاج کے حوالے سے حکومت کو سکیورٹی خدشات ہیں، ملک اس وقت احتجاجی دھرنوں اور ایسے حالات کا متحمل نہیں ہوسکتا۔ گورنر پنجاب کے مطابق پرامن احتجاج سب کا حق ہے، تاہم احتجاج کے دوران امن و امان برقرار رکھنا بھی ضروری ہے۔
سردار سلیم حیدر خان نے کہا کہ پی ٹی آئی کا پرانا ٹریک ریکارڈ سب کے سامنے ہے، اداروں پر حملے، پی ٹی وی میں توڑ پھوڑ، پارلیمنٹ میں داخل ہونا اور مختلف مقامات پر ہنگامہ آرائی کے واقعات پیش آچکے ہیں۔ ان کا کہنا تھا کہ اگر احتجاج میں کارکنوں کو کنٹرول نہ کیا جاسکے یا ایسے عناصر شامل ہوں جو بین الاقوامی سطح پر ملک کی ساکھ کو نقصان پہنچائیں تو راستے بند کرنا اور کنٹینرز لگانا ضروری ہوجاتا ہے۔
گورنر پنجاب نے کہا کہ اس سے پہلے ہونے والے احتجاج میں بھی سکیورٹی فورسز اور پولیس کے جوان شہید ہوئے، یہ ہمارے اور آپ کے ہی بچے ہیں۔ سکیورٹی فورسز نے ریاست کے لیے کھڑے ہونا ہے اور قانون و امن و امان پر عملدرآمد یقینی بنانا ہے۔
سردار سلیم حیدر خان کا کہنا تھا کہ پی ٹی آئی کے احتجاج میں کئی جوان شہید ہوئے، پی ٹی آئی کا ٹریک ریکارڈ درست نہیں جس کی وجہ سے حکومت کو مجبوراً کنٹینرز لگا کر راستے روکنے پڑتے ہیں۔ ان کے مطابق اگر کنٹینرز ہٹا دیے جائیں تو اس بات کی ذمہ داری کوئی لینے کو تیار نہیں کہ احتجاج مکمل طور پر پرامن رہے گا۔
گورنر پنجاب کے یہ ریمارکس 26 ستمبر 2026 کو لاہور میں میڈیا سے گفتگو کے دوران سامنے آئے۔
