پنجاب میں سبزی منڈیوں میں نئی اصلاحات ، کاشتکار کیسے فائدہ اٹھا سکتے ہیں ،پھڑیوں اور آڑتیوں کا مستقبل کیا ہوگا ؟

لاہور(پنجاب پوسٹ)پنجاب حکومت کی ہدایت پر ایگریکلچر مارکیٹنگ ریگولیٹری اتھارٹی (پامرا) کی جانب سے صوبے بھر کی زرعی منڈیوں کو جدید خطوط پر استوار کرنے اور مارکیٹنگ نظام میں اصلاحات کا عمل تیزی سے جاری ہے۔ اصلاحاتی اقدامات کا مقصد زرعی منڈیوں میں سہولیات کی بہتری، شفافیت، بہتر گورننس اور کاشتکاروں، تاجروں و صارفین کے لیے جدید نظام کی فراہمی ہے۔

کاہنہ، کاچھا منڈی فیز ون میں پلاٹوں کی الاٹمنٹ کے لیے اہل امیدواروں کی قرعہ اندازی 10 ستمبر 2026 کو ہوگی۔ پامرا کی جانب سے کاہنہ کاچھا، ملتان اور فیصل آباد میں "منڈی مارٹ” کے فلیگ شپ منصوبوں کا بھی آغاز کیا گیا ہے، جس سے زرعی مصنوعات کی مارکیٹنگ اور کاروباری سرگرمیوں کو جدید تقاضوں سے ہم آہنگ کرنے میں مدد ملے گی۔

یہ بھی پڑھیں:بدبودار، کائی زدہ اور نمی والی گندم فراہم کی جارہی ہے، پاسکو 3ہزار 800روپے فی من گندم سپلائی کر رہا ہے، فلور ملز مالکان

لاہور کی بادامی باغ فروٹ اینڈ ویجیٹیبل مارکیٹ میں خوبصورتی اور ترقیاتی پروگرام بھی جاری ہے۔ سبزی منڈی بادامی باغ میں اسٹیٹ آف دی آرٹ پھڑی شیڈ کی تعمیر جاری ہے، جس میں تقریباً 400 پھڑیوں کی گنجائش ہوگی۔ یہ جدید پھڑی شیڈ "سہولت رینٹل ماڈل” کے تحت تیار کیا جا رہا ہے، جس سے منڈی میں کاروبار کرنے والوں کو بہتر اور منظم سہولیات میسر آئیں گی۔

دوسری جانب پاکپتن اور ساہیوال کی فروٹ اینڈ ویجیٹیبل مارکیٹس میں ترقیاتی کام اور نیلامی شیڈز کی تعمیر مکمل کرلی گئی ہے۔ پامرا مارکیٹ کمیٹیوں کی جانب سے EFOES لیول-3 حاصل کرنا بھی اصلاحاتی عمل میں اہم سنگِ میل قرار دیا گیا ہے۔

یہ بھی پڑھیں:پنجاب میں ماحولیاتی خلاف ورزیوں کیخلاف گرینڈ آپریشن شروع کرنے کا فیصلہ، کیا کارروائیاں کی جارہی ہیں ؟

حکام کے مطابق جدید زرعی مارکیٹنگ نظام کے ذریعے کاشتکاروں، تاجروں اور صارفین کو بہتر اور جدید سہولیات فراہم ہوں گی، جبکہ منڈیوں میں گورننس اور شفافیت کو یقینی بنانے کے لیے اصلاحاتی اقدامات کا سلسلہ آئندہ بھی جاری رکھا جائے گا۔