الٹا چور کوتوال کو ڈانٹے ،بچی اغوا کیس، اہلکاروں کی ویڈیو بنانا خاتون کو مہنگا پڑ گیا ، پولیس کا سخت ایکشن

لاہور( پنجاب پوسٹ ) رائیونڈ میں پولیس اہلکاروں کی وائرل ویڈیو کے بارے میں ترجمان نے مئوقف جاری کردیا ہے ، پولیس ترجمان کے مطابق اغوا کیس میں پولیس کارروائی کی ویڈیو سوشل میڈیا پر وائرل کے حوالے سے تحقیقات جاری ہیں ۔ ایک شہری نے 13 سالہ بچی کے اغوا کے حوالے سے 15 پر کال کی ، بچی کے اغوا کی اطلاع موصول ہونے پر رائیونڈ پولیس نے والد کی مدعیت میں مقدمہ درج کر کے بازیابی کےلیے کاروائی کا آغاز کیا۔ ابتدائی تحقیقات کی روشنی میں پولیس ٹیم ملزم کے گھر تفتیش کیلئے پہنچی۔ گھر میں موجود خاتون نے پولیس سے تعاون کی بجائے ویڈیو بنانا شروع کی
پولیس ترجمان کے مطابق خاتون نے ویڈیو کے ذریعے پولیس کارروائی کو متنازع بنانے کی کوشش کی، وائرل ویڈیو میں موجود اہلکار احمد کے مطابق خاتون کو ضابطہ کار کے مطابق ویڈیو بنانے سے روکا،تاہم واقعہ کے دوران اختیارات سے تجاوز کے تاثر پر محکمانہ انکوائری کا آغاز کر دیا گیا،ڈی آئی جی آپریشنز فیصل کامران نے انکوائری ایس پی صدر کو سونپ دی۔
ترجمان پولیس کا مزید کہنا ہے کہ اگر کوئی اہلکار قصوروار پایا گیا تو محکمانہ کارروائی عمل میں لائی جائے گی، بچی کی بازیابی اور ملزم کی گرفتاری کیلئے پولیس ٹیمیں متحرک ہیں، ترجمان کے مطابق قانونی تقاضوں کے مطابق کارروائی جاری ہے اور مزید تفتیش عمل میں ہے،